جەڭىستى جاقىنداتقان بارلاۋشىلار تۋرالى كوركەم فيلم كورەرمەنگە جول تارتپاق

استانا. قازاقپارات - «حابار» اگەنتتىگى» مەن «الاماس فيلم» كومپانياسى بىرلەسىپ تۇسىرگەن «پريكاز ۆەرنۋتسيا جيۆىم!» اتتى كينوتۋىندى كورەرمەنگە جول تارتپاق، دەپ حابارلادى حابار اگەنتتىگىنەن.

«شىعارماشىلىق توپ سوعىستاعى بارلاۋشىلاردىڭ جانقيارلىق ەرلىگىن، سول زاماننىڭ اۋىرتپالىعىن كورسەتۋگە تىرىسقان. ءبىر ەرەكشەلىگى - رەجيسسەر بۇل تۋىندىنى فلەشبەك ستيلىندە تۇسىرگەن. ياعني كورەرمەن باس كەيىپكەرلەرمەن بىرگە وتكەنگە ورالىپ، ويىن بۇگىنمەن ساباقتايدى. 5 سەريالى كينوتۋىندى مايدان شەبىندە تابىسقان 2 دوستىڭ تاعدىرى ارقىلى ءوربيدى»، دەلىنگەن حابارلامادا.

سەناري جەلىسى بويىنشا، جەڭىستى جاقىنداتۋعا جانىن سالعان بارلاۋشى- جاۋىنگەرلەر اسكەري تاپسىرمانى ورىنداۋ كەزىندە قورشاۋعا ءتۇسىپ قالادى. وق پەن وتتىڭ اراسىنان امان شىققان 2 دوس قيان كەسكى ۇرىستا ءبىر-بىرىنەن كوز جازىپ قالادى. ەلگە ورالىپ، ەڭبەك ەتىپ، ۇرپاق ءوسىرىپ، نەمەرە سۇيەدى.

ارادا ءبىراز جىلدار وتكەندە تاعدىر ولاردى قايتا تابىستىرادى. باستى رولدەردە قاراعاندى ورىس دراما تەاترىنىڭ اكتەرى اندرەي مارىچيەۆ پەن كورەرمەنگە «جاۋ جۇرەك مىڭ بالا»، «قارا شاڭىراق» فيلمدەرىنەن جاقسى تانىس اكتەر داۋرەن سەرعازين سومدايدى.