ون جەتىنشى عاسىردا ءومىر سۇرگەن تەڭىز قاراقشىسىنىڭ قازىناسى تابىلدى

استانا. قازاقپارات - تەڭىز ءتۇبىن زەرتتەۋمەن اينالىساتىن ارحەولوگتار ماداگاسكار جاعالاۋىنان كەسەك كۇمىس تاۋىپ الدى، دەپ حابارلادى BBC اگەنتتىگى.

عالىمداردىڭ پىكىرىنشە، قازىنا XVII عاسىردا ءومىر سۇرگەن شوتلانديالىق اتاقتى تەڭىز قاراقشىسى ۋيليام كيددتىڭ بايلىعى بولۋى مۇمكىن.

ماداگاسكاردىڭ شىعىسىنداعى سەنت-ماري ارالدارى جاعاسىنان تابىلعان، سالماعى - 50 كەلى.

تابىلعان قازىنا ماداگاسكار پرەزيدەنتىنە سالتاناتتى تۇردە تابىس ەتىلدى.

1695-جىلى كاپيتان كيدد بريتانيا ۇكىمەتى تاراپىنان انگليامەن جاۋلاسقان ەلدەردىڭ ساۋدا كەمەلەرىن توناۋعا رەسمي تۇردە رۇقسات، پاتەنت العان.

5 -جىل بويى ول كاريب تەڭىزى مەن ءۇندى مۇحيتىندا كەمەلەردى توناپ، ەلدىڭ ۇرەيىن قاشىرعان. كەيىن بريتانيا تاعىنا قاستاندىق قىلىپ، 1701-جىلى ۇستالعان، لوندوندا ءولىم جازاسىنا كەلدى.