ورالدا م. مامەتوۆانى ەسكە الۋعا ارنالعان دزيۋدودان حالىقارالىق جارىس مارەگە جەتتى

ورال. قازاقپارات - ورال قالاسىندا كەڭەس وداعىنىڭ باتىرى مانشۇك مامەتوۆانى ەسكە الۋعا ارنالعان دزيۋدودان Ⅵحالىقارالىق تۋرنير مارەگە جەتتى.

وبلىستىق دەنە شىنىقتىرۋ جانە سپورت باسقارماسىنان تۇسكەن مالىمەتكە قاراعاندا، ءداستۇرلى جارىسقا 12 كوماندا قۇرامىندا 200 دەي سپورتشى قاتىستى.

ايتۋلى دودادا ب ق و قۇراماسى 2 التىن، 3 كۇمىس جانە 2 قولا مەدالدى يەلەندى. جارىستىڭ ءبىرىنشى كۇنى قازبەك سۇپىعاليەۆ (60 كەلى) پەن مۇرات باۋبەكوۆ (66 كەلى) كۇمىس جۇلدەگەر اتانسا، ەرنازار حامزين (81 كەلى) ءۇشىنشى ورىنعا كوتەرىلدى.

ايەلدەر اراسىندا 52 كەلى سالماقتا باتىس قازاقستاندىقتار گاۋھار ەرماعانبەتوۆا مەن گۇلدانا المۇحامبەتوۆا ءوزارا بەلدەستى. مۇندا جاس تا بولسا، بولاشاعىنان ءۇمىت كۇتتىرەتىن گ. ەرماعانبەتوۆا جەڭىسكە جەتتى. ەكىنشى كۇنى 90 كەلى سالماقتا فينالعا باتىس قازاقستاندىقتار اڭسار حامزين مەن ولجاس سۇلەيمەنوۆ شىقتى. الايدا جارتىلاي فينالدا اڭسار جاراقات الىپ قالعاندىقتان، كىلەمگە شىعا المادى. ءسويتىپ جەڭىمپاز اتانعان و. سۇلەيمەنوۆ ق ر سپورت شەبەرى تالابىن ورىندادى. 100 كەلىگە دەيىن سالماقتا تەمىرلان كولباي قولا جۇلدەنى يەلەندى. باتىس قازاقستاندىقتاردى حالىقارالىق جارىسقا ەرلەر اراسىندا وبلىس قۇراماسىنىڭ اعا باپكەرى سايىن ەرعاليەۆ پەن جاستاردى جاتتىقتىراتىن ارمان بايەنوۆ دايىندادى.

قازىرگى كەزدە ب ق و قۇراماسى 28-31- مامىر ارالىعىندا قاراعاندىدا وتەتىن قازاقستان سپارتاكياداسىنا ازىرلەنۋدە.

ايتا كەتەيىك، قازاقستان قۇراماسى ساپىندا رينات يبراگيموۆ 9-10- مامىردا باكۋ قالاسىندا وتەتىن حالىقارالىق گران-سلام، ال ازامات مۇقانوۆ 13-14- ماۋسىمدا بۋداپەشتە بولاتىن حالىقارالىق گران-پري تۋرنيرىنە قاتىسپاقشى. بۇل ەكەۋى دە -ريو-دە-جانەيرودا 2016-جىلى وتەتىن وليمپيادالىق ويىنعا قاتىسۋدان ۇمىتكەر. ونىڭ ۇستىنە بيىل 25-30- تامىزدا استانا قالاسىندا دزيۋدودان قازاقستاندا العاش رەت الەم چەمپيوناتى وتەدى. وندا 2013-جىلى ريو-دە-جانەيرودا وتكەن الەم بىرىنشىلىگىنىڭ كۇمىس جۇلدەگەرى ازامات مۇقانوۆ 66 كەلى سالماقتا سىنعا تۇسەتىن بولادى.

اۆتور: ەلجان ەرالى