قاراعاندىدا اسكەري بولىمدە داڭق اللەياسى اشىلدى

قاراعاندى. قازاقپارات - قاراعاندىدا ق ر قارۋلى كۇشتەرىندە قىزمەت ەتۋگە شاقىرىلعانداردى سالتاناتپەن شىعارىپ سالدى، دەپ حابارلادى وبلىس اكىمىنىڭ باسپا ءسوز قىزمەتى.

بۇل ءراسىم 31775- اسكەري ءبولىمنىڭ جاتتىعۋ الاڭىندا ءوتتى. اسكەرگە شاقىرىلعانداردى شىعارىپ سالۋعا قاراعاندى گارنيزونىنىڭ اسكەري قىزمەتشىلەرى، ۇلى وتان سوعىسىنىڭ ارداگەرلەرى، تىل ەڭبەككەرلەرى، مەملەكەتتىك ورگانداردىڭ، كۇش-قۋات قۇرىلىمدارىنىڭ وكىلدەرى، ارناۋلى ورتا وقۋ ورىندارىنىڭ وقۋشىلارى مەن مەكتەپ بىتىرەتىن تۇلەكتەر، اسكەري قىزمەتشىلەردىڭ وتباسى مۇشەلەرى، اسكەرگە شاقىرىلعانداردىڭ اتا-انالارى قاتىستى.

«اعالارىڭىزبەن بىرگە سىزدەرگە ەل پرەزيدەنتى، قارۋلى كۇشتەردىڭ جوعارعى باس قولباسشىسى نۇرسۇلتان نازاربايەۆ العا قويعان قازاقستان ازاماتتارىن، ولاردىڭ بەيبىت ەڭبەگىن قورعاۋدا جاۋاپتى مىندەت جۇكتەلىپ وتىر. سىزدەردىڭ قوس مەرەكە - وتان قورعاۋشى كۇنى مەن ۇلى وتان سوعىسىنداعى جەڭىستىڭ 70 جىلدىعى قارساڭىندا اسكەري قىزمەتكە اتتانۋلارىڭىزدىڭ ءمانى زور»، - دەدى اسكەرگە شاقىرىلعاندارعا قاراتا سويلەگەن سوزىندە قاراعاندى وبلىسىنىڭ اكىمى نۇرمۇحامبەت ابدىبەكوۆ.

ول بولاشاق ساربازدارعا اسكەري بورىشتى ادال اتقارۋلارىنا، مايدانگەرلەردىڭ جاۋىنگەرلىك داڭقىن لايىقتى جالعاستىرۋلارىنا تىلەكتەستىگىن ءبىلدىردى.

اسكەرگە شاقىرىلعانداردى سونداي-اق «استانا» وڭىرلىك قولباسشىلىعى اسكەرلەرى قولباسشىسى، گەنەرال- مايور سۇلتان كامالەتدينوۆ قۇتتىقتادى. تالعات بيگەلدينوۆ اتىنداعى رەسپۋبليكالىق اسكەري مەكتەپ تاربيەلەنۋشىلەرى شاراعا قاتىسۋشىلارعا ەسكەرتكىش سىيلىقتار تاپسىردى.

مەرەكەلىك شارا بارىسىندا اسكەري ءبولىمنىڭ داڭق اللەياسى اشىلدى. سونىمەن بىرگە، قاتىسۋشىلار ءومىر مەن بەيبىتشىلىكتىڭ سيمۆولى رەتىندە اللەياعا جاسىل شىرشالار وتىرعىزدى.