كاناداداعى قازاقستاندىق ستۋدەنتتەر «قازاليانسقا» قوسىلدى

استانا. قازاقپارات - تورونتو قالاسىنداعى (كانادا) قازاقستاندىق ستۋدەنتتەر قوعامداستىعى «قازاليانس» بىرلەستىگىنىڭ قۇرامىنا كىرۋگە نيەت ءبىلدىردى.

جۋىردا تورونتوداعى قوعامداستىق باسشىلارى مەن بەلسەندىلەرى «قازاليانس» ۇيىمىنا بىرىگۋ تۋرالى دەكلاراتسياعا قول قويدى. بۇل تۋرالى «قازاقستان-2050» جالپىۇلتتىق قوزعالىسىنىڭ باسپا ءسوز قىزمەتى حابارلادى.

«قازاليانس» پرەزيدەنتى راشيد ايۋپوۆ قوسىلۋ تۋرالى شەشىمنىڭ ماڭىزدىلىعىنا توقتالىپ، سونىمەن بىرگە، «قازاليانس» بىرلەستىگىنىڭ اياسىندا ءوز قىزمەتتەرىن جۇزەگە اسىرۋ قازاقستان ستۋدەنتتەرىنىڭ شەتەلدىك قوعامداستىقتارىنا جاڭا مۇمكىندىكتەر بەرەتىنىن ايتىپ ءوتتى.

تورونتوداعى قازاقستان ستۋدەنتتەرىنىڭ قاۋىمداستىعى 2008-جىلى قۇرىلدى جانە وسى ۋاقىتقا دەيىن ونىڭ قۇرامىنا تورونتو ۋنيۆەرسيتەتى، يورك ۋنيۆەرسيتەتى، راەرسون ۋنيۆەرسيتەتى، ماكگيلل ۋنيۆەرسيتەتى، ساسكاچيەۆان ۋنيۆەرسيتەتىنىڭ ستۋدەنتتەرى مەن تۇلەكتەرى، سونىمەن قاتار، كانادانىڭ كوللەدجدەرى مەن تىلدىك مەكتەپتەرى ستۋدەنتتەرى كىردى.