قاھارمان اقىن ابدوللا جۇماعاليەۆتىڭ ءمۇسىنى اشىلدى
الدىمەن ۇلى جەڭىستىڭ 70 جىلدىعىنا وراي سوعىسقا جوسالى اۋىلىنان قاتىسىپ، ەلگە امان ورالعان مايدانگەرلەرگە ارنالعان ەسكەرتكىش تاقتا اشىلدى. جوسالىدان مايدانعا 350 گە جۋىق ەر ازامات اتتانسا، سونىڭ 90 عا جۋىعى عانا ءتىرى قايتتى.
سوعىستان قايتپاعان 246 ارىستىڭ اتى-ءجونى بۇدان بۇرىن تاسقا قاشالىپ جازىلعان بولاتىن. ەندى ۇرپاقتارى ەلگە ورالىپ، بەيبىت كەزەڭدە ەڭبەك ەتكەن مايدانگەرلەر بەينەلەرىنە دە تاعزىم ەتەتىن بولادى.
ا. جۇماعاليەۆ اتىنداعى جوسالى ورتا مەكتەبىندە سالتاناتتى ءراسىم قاھارمان اقىن ءمۇسىنىن اشۋمەن باستالدى. دەمەۋشىلەر مەن اۋىل حالقىنىڭ قارجىسىنا ورناتىلعان بۇل ەسكەرتكىشتىڭ اۆتورى - ورالدىق ءمۇسىنشى دميتري بايمۇقاشيەۆ. سونداي-اق مەكتەپ مۇراجايى دا جاڭعىرتىلىپ، قايتا اشىلدى. مۇندا ابدوللا جۇماعاليەۆ قانا ەمەس، باسقا دا مايدانگەرلەر، ەلدىڭ قادىرلى ادامدارى، اۋىل تاريحى تۋرالى قۇندى جادىگەرلەر قويىلعان.
شارا بايگەتوبەدە وتكەن دالا قىزىقتارىنا جالعاستى. كورشىلەس اۋدانداردىڭ دا سايگۇلىكتەرى قوسىلعان الامان بايگەدە شىڭعىرلاۋ اۋدانى قاراعاش اۋىلىنان كەلگەن نۇرالى دوسجانوۆتىڭ اتى وزسا، توق بايگەدە سىرىمنىڭ كوزدىعارا ەلدى مەكەنىنەن سەرىك مۇتيەۆتىڭ ارعىماعى ءبىرىنشى كەلدى.
پالۋاندار كۇرەسىندە جوسالىلىق ايبەك عابدەشيەۆ «قازاقستان بارىسىنىڭ» فينالدىق سايىستارىنا قاتىسىپ جۇرگەن ەدىل ۇسەنوۆتەن ايلاسىن اسىرىپ، ءبىرىنشى ورىندى ەنشىلەدى. اۋىل ونەرپازدارى قويعان كونسەرت، كوكپار دا كوپشىلىك كوڭىلىنەن شىقتى.
اۋدان اكىمى ابات شىنىبەكوۆتىڭ ايتۋىنشا، ابدوللا جۇماعاليەۆتىڭ 100 جىلدىعىنا ارنالعان مادەني-سپورتتىق شارالار جىل بويى جالعاسادى. الداعى تۇرعان ماقسات-مىندەتتىڭ ءبىرى - ابدوللا ەرلىكپەن قازا تاپقان جەردى انىقتاۋ.
ايتا كەتەيىك، ماسكەۋ تۇبىندەگى ۆولوكالام تاس جولىن اتاقتى پانفيلوۆ ديۆيزياسى قورعاعانى ءمالىم. مىنە، وسىنداي قىسىلتاياڭ ساتتە نەگىزگى كۇشتىڭ شەگىنۋىنە مۇرشا بەرۋى ءۇشىن يۆان دۋناي، ءابىل قۇندىبەكوۆپەن بىرگە جاۋدى توسىپ، جولدا قالعان قازاق اقىنى ارىستانشا ايقاستى.
ءتىپتى جانىنداعى جاۋىنگەردىڭ «ەندى جونەلەيىك» دەگەنىنە كونبەي، «جازباشا بۇيرىق كەلمەي، شەگىنۋگە حاقىم جوق»، دەپ، اۋىل شەتىندەگى ءۇيدىڭ شاتىرىنا بەكىنىپ الىپ، قارا قۇرتشا قاپتاعان باسقىنشىلارعا اۆتوماتىنان وق جاۋدىرۋمەن بولدى. اقىرى قاس دۇشپانعا بەرىلمەي، سول ۇيدە ورتەنىپ كەتە بارعان بولاتىن. وكىنىشكە قاراي، ا. جۇماعاليەۆتىڭ وسى قاھارماندىق ەرلىگى رەسمي ورگاندار تاراپىنان باعالانباي قالدى.
اۆتور: ەلجان ەرالى
