سوعىس تۋرالى فيلمگە تۇسكەن قازاق بالاسى رەسەيلىك رەجيسسەرلەردى تاڭعالدىردى

استانا. قازاقپارات - الماتىلىق قاراپايىم ەلەكتر مامانى رەسەيلىك رەجيسسەرلەردى تاڭعالدىردى.

ۇلى وتان سوعىسى تۋرالى كوركەم فيلمگە شاقىرتۋ العان قازاق بالاسى ماسكەۋدە وتكەن كاستينگتە جۇزدەگەن ۇمىتكەرلەر اراسىنان باستى رولگە لايىق دەپ تانىلدى.

وتكەن جىلدىڭ جازىنان باستاپ تۇسىرىلگەن فيلم جاقىندا پروكاتقا جول تارتپاق. تۋىندى سوعىس جىلدارىنداعى ەكى جاۋىنگەردىڭ باسىنان كەشكەندەرى جايلى. الماتىداعى العاشقى كورسەتىلىم وتان قورعاۋشى كۇنىمەن تۇسپا-تۇس كەلىپ وتىر.

ءامىر الماتىداعى جەكە فيرمالاردىڭ بىرىندە ەلەكتر قۇرالدارىن جوندەۋشى بولىپ ەڭبەك ەتەدى. وتكەن جىلى جاس جىگىت ماسكەۋدە جەڭىستىڭ مەرەيتويىنا ارنالعان كينوعا ىرىكتەۋ ءجۇرىپ جاتقانىن ەستيدى. بالا كەزىندە ءبىر-ەكى رەت قازاقستاندىق رەجيسسەرلەردىڭ كينولارىندا توبە كورسەتكەن ول مۇمكىندىكتى ءمۇلت جىبەرمەۋدى ءجون كورگەن.

«موسفيلم» كينوستۋدياسىندا وتكەن كاستينگتە تاڭداۋ 23 جاستاعى جەرلەسىمىزگە تۇسەدى. رەجيسسەر كارەن شاحنازاروۆ «دوروگا نا بەرلين» تۋىندىسىنىڭ باستى رولىنە جۇزدەن استام ۇمىتكەردىڭ اراسىنان ءامىردى بەكىتكەن.

فيلمنىڭ ماقساتى -  سوعىس جىلدارىنداعى ۇلتتار بىرلىگى مەن شىعىس حالىقتارىنىڭ ەرلىگىن كورسەتۋ ەدى. قازاق جاۋىنگەرى جورابايەۆ الماتى وبلىسى تالعار ەلدى مەكەنىنەن سوعىسقا اتتانادى. اڭگىمەگە شورقاق بولعانىمەن، ول الدىڭعى شەپتە كەسكىلەسكەن ۇرىس اراسىندا جۇرگەن.

«قاتارداعى جاۋىنگەر جورابايەۆ -  وتە بايسالدى ادام. ورىس ءتىلىن ناشار بىلگەندىكتەن، ول كوپ جاعدايدا ءۇنسىز قالادى. ءبىراق ءوزىنىڭ ىشكى جان-دۇنيەسى مەن باتىرلىعىن ەموتسيامەن ءبىلدىرىپ جاتادى. مەن دە بار ونەرىمدى سالىپ ويناۋعا تىرىستىم. كەيىپكەردى اشۋ ءۇشىن كەڭەس وكىمەتى كەزىندە تۇسىرىلگەن فيلمدەردى كوپ قارادىم»، - دەيدى ءامىر ءابدىحالىقوۆ.

فيلم ەممانۋيل كازاكيەۆيچتىڭ «دۆوە ۆ ستەپي» دەپ اتالاتىن شىعارماسىنىڭ جەلىسىمەن تۇسىرىلگەن. قاتارداعى قازاق جاۋىنگەرىنىڭ تاعدىرىنا ارنالعان تۋىندى سوعىس جاعدايىنداعى ادامگەرشىلىك قارىم-قاتىناستى، دوسقا دەگەن جاناشىرلىقتى سۋرەتتەيدى. باستى كەيىپكەرلەردىڭ ءتىلى ءارتۇرلى بولسا دا، ەكەۋارا ۇعىنىسىپ كەتەدى. قوس ساربازدىڭ دوستىعى ارقىلى جەڭىسكە دەگەن قۇلشىنىس بەينەلەنگەن.

ءامىر كوركەم فيلمنىڭ ماسكەۋدەگى تۇساۋكەسەرىنەن ورالدى. رەسەيلىك كورەرمەن تۋىندىنى جاقسى قابىلداعان. قازىر ەڭبەك دەمالىسىندا جۇرگەن جىگىت ءوزىنىڭ ۇيرەنشىكتى جۇمىس ورنىنا قايتا ورالماق.

«ءوز جۇمىسىمدى دا تاستاپ كەتكىم كەلمەيدى. مەن ول جەردەن سۇرانىپ كەتكەن بولاتىنمىن. ەگەر الداعى ۋاقىتتا ۇسىنىستار بولىپ جاتسا، ەكەۋىن دە قاتار الىپ جۇرەمىن دەگەن ويدامىن»، - دەپ اتاپ ءوتتى اكتەر.

ءتۇسىرۋ توبى 7- مامىردا الماتىدا باس قوسادى. قالاداعى ءىرى كينوتەاترلاردىڭ بىرىندە «دوروگا نا بەرلين» فيلمىنىڭ تۇساۋكەسەرى وتپەك. فيلم اۆتورلارى جاۋىنگەر جورابايەۆتىڭ تۋعان ەلى بۇل كينونى جوعارى باعالايدى دەگەن سەنىمدە. پرەمەرادان سوڭ فيلم ۇلكەن ەكرانعا جول تارتادى.

astanatv.kz