بەلارۋس جەرىندە «ورالۋ» فيلمىنىڭ شايقاس ساحنالارى ءتۇسىرىلىپ جاتىر
فيلمنىڭ باس پروديۋسەرى - ءاليا نازاربايەۆا. فيلم جەتىمدىكتى باستان كەشىپ، جات ەلدە ءجۇرىپ، قيىندىق كورسە دە تاعدىردىڭ تاۋقىمەتىنە توتەپ بەرگەن ءىلياس ەسىمدى جىگىتتىڭ تاعدىرىن باياندايدى. ايداۋدا جۇرگەن ول اناسىن ساعىنىپ، قالاي بولعاندا دا تۋعان جەرىنە ورالاتىنىنا سەنەدى. تۋىندىدا انانىڭ پەرزەنتىنە دەگەن شەكسىز ماحابباتى، ۇلىنىڭ وتانىنا دەگەن ادالدىعىن كورسەتۋدى ماقسات ەتكەن.
«بۇل كارتينا الەمنىڭ قاي ەلىندە كورسەتىلسە دە، قىزىقتى ءارى تۇسىنىكتى بولادى دەپ ويلايمىن. سەبەبى باس كەيىپكەردىڭ تاعدىرى ارقىلى ءبۇتىن ءبىر ءداۋىردىڭ تىنىسىن بەرۋگە تىرىستىق»، - دەيدى «ورالۋ» فيلمىنىڭ رەجيسسەرى: اقان ساتايەۆ.
بەلارۋس ەلىندە فيلمنىڭ 30 دان اسا قويىلىمدارىن ءتۇسىرۋ جوسپارلانعان. ۇلى وتان سوعىسى جىلدارىنداعى ەڭ الاپات، سۇراپىل شايقاستاردىڭ ءبىرى - دنەپر ءۇشىن شايقاستى ءتۇسىرۋ 12 كۇنگە سوزىلماق. تاريحتى جاڭعىرتىپ، سول كەزەڭدى باستان كەشىرۋ ءبىز ءۇشىن ۇلكەن مەكتەپ بولدى، - دەيدى اكتەرلەر.
- «سول ءداۋىردى سەزىنۋ ارقىلى اتا-بابالارىمىزعا دەگەن قۇرمەتىمىز كۇشەيە تۇسۋدە. ولاردىڭ قانداي قيىندىقتان وتكەنى، ەل ءۇشىن جەر ءۇشىن جانىن پيدا ەتكەن. مەن ءوزىم ءۇشىن وسى جاعىنان ادەمى اسەر الۋدامىن»، دەيدى اكتەر ءادىل احمەتوۆ.
فيلمدى تۇسىرۋگە قازاقستان، بەلارۋس، رەسەي، مەن ۋكراينانىڭ ەڭ ۇزدىك كينوگەرلەرى شاقىرىلعان. كاسىبي كاسكادەرلەر مەن پيروتەحنيكتەر فيلمنىڭ ساپالى شىعۋى ءۇشىن تەر توگۋدە. جالپى ساحنالىق تۇسىرىلىمدەرگە 500 مىڭنان استام ادام تارتىلىپ، 300 دەي اسكەري ساۋىت سايماندار پايدالانىلعان.
كەلەسى ءتۇسىرىلىم ازەربايجان ەلىندە جالعاسادى. فيلمنىڭ العاشقى كورسەتىلىمى تاۋەلسىزدىك مەرەكەسى قارساڭىندا جەلتوقسان ايىنا جوسپارلانىپ وتىر.
