تارازدا بولاشاق وليمپياداشىلار ءۇشىن سپورت كەشەنى اشىلدى
سپورت كەشەنىنىڭ اشىلۋىنا جامبىل وبلىسىنىڭ اكىمى كارىم كوكىرەكبايەۆ قاتىستى.
جامبىل وبلىسى دەنە شىنىقتىرۋ جانە سپورت باسقارماسىنان حابارلاعانىنداي، جالپى قۇنى 531,6 ميلليون تەڭگە تۇراتىن سپورت كەشەنىن سالۋ 2014-جىلعى ناۋرىزدا باستالعان بولاتىن. عيماراتتىڭ جالپى اۋدانى 2,56 مىڭ شارشى مەتردى قۇرايدى.
«جامبىل وبلىسىندا بولاشاق سپورتشىلارعا ارنالعان سپورت مەكتەبىنىڭ مۇنداي عيماراتى بۇرىن بولعان ەمەس. بۇل جان-جاقتى سپورت كەشەنى، وندا چەمپيونداردى ءوسىرىپ-تاربيەلەۋگە بارلىق جاعداي جاسالعان»، - دەدى وبلىستىق سپورت باسقارماسىنىڭ باستىعى گاملەت قايناربەكوۆ.
سپورت كەشەنىنىڭ ءبىرىنشى قاباتىندا تەحنيكالىق بولمەلەر، 60 ورىندىق اسحانا، 14 ادامعا ارنالعان تير بار. ەكىنشى قاباتتا سپورت زالى ورنالاسقان، وندا ءبىر ساباققا 30 ادام سيادى. 180 شارشى مەترلىك باسسەين، ماسساج كابينەتى، شەشىنەتىن جەر، جۋىناتىن بولمەلەر جانە باسقالارى كوزدەلگەن. ءۇشىنشى قاباتتا جاتتىعۋ زالى، ادىسكەردىڭ كابينەتى، مەديتسينالىق كابينەت، جاتتىقتىرۋشىلاردىڭ كابينەتى جاساقتالعان.
«بۇل سپورت كەشەنىندە ەندى جىل بويى وقۋ-جاتتىعۋ ساباقتارىن وتكىزۋگە، سپورت تۇرلەرىنەن ءارتۇرلى جارىستار وتكىزۋگە بولادى»، - دەپ ناقتىلادى وبلىستىق سپورت باسقارماسىندا.
