08:29, 06 - مامىر 2015 | GMT +5
فوتو ءتىلشىنى شاپالاقپەن تارتىپ جىبەرگەن كورولدىڭ كومەكشىسى جۇمىسسىز قالدى
استانا. قازاقپارات - ساۋد ارابياسىنىڭ كورولى سالمان يبن ءابدۋل-ءازيز ەر-ريادقا كەلگەن ماروككو كورولى مۇحاممەد VI- نى سۋرەتكە تۇسىرگەن فوتو ءتىلشىنى بەتىنەن شاپالاقپەن تارتىپ جىبەرگەنى ءۇشىن كورولدىك حاتتاما قىزمەتىنىڭ باسشىسى موحاممەد توبايشيدى جۇمىستان شىعارىپ جىبەردى، دەپ جازادى «BBC» اگەنتتىگى.
شارا كەزىندە جاسالعان بەينە جازبادا توبايشيدىڭ ەكى مونارحتىڭ ساۋد ارابياسى استاناسىنىڭ اۋەجايىندا ءبىر-بىرىمەن امانداسقان ساتىندە ءتىلشىنىڭ بەتىنەن شاپالاقپەن تارتىپ جىبەرگەنى كورىنىپ تۇر.
بۇل بەينەجازبا جاريالانعان سوڭ، ەل تۇرعىندارى كورولدەن كومەكشىسىنە قاتىستى شارا قولدانۋدى سۇراعان. مونارح كوپ ويلانباستان مۇحاممەد توبايشيدى جۇمىسسىز قالدىردى.
