سۋ تاسقىنىنان زارداپ شەككەن قاراعاندى وبلىسىنىڭ ع. مۇستافين كەنتىندە جاڭا ۇيلەردىڭ قۇرىلىسى باستالدى

قاراعاندى. قازاقپارات - سۋ تاسقىنىنان زارداپ شەككەن قاراعاندى وبلىسى بۇقار جىراۋ اۋدانى ع. مۇستافين كەنتىندە جاڭا ۇيلەردىڭ قۇرىلىسى باستالدى، دەپ حابارلادى وبلىس اكىمدىگىنىڭ باسپا ءسوز قىزمەتىنەن.

«اۋقىمدى جۇمىس اتقارۋعا تۋرا كەلەدى، ويتكەنى ايماق بويىنشا 349 اپاتتىق ءۇيدىڭ 272 ءۇيى ع. مۇستافين اتىنداعى كەنتكە تيەسىلى. ونىڭ 198 بۇزۋعا جاتاتىن باسپانا»، - دەدى وبلىس اكىمى نۇرمۇحامبەت ابدىبەكوۆ قۇرىلىستىڭ ىرگەتاسىن قالاۋ راسىمىندە.

وبلىس اكىمىنىڭ ءبىرىنشى ورىنباسارى اسىلبەك دۇيسەبايەۆ ايماق باسشىسىنا جاڭا ۇيلەردىڭ سىزبالارىن كورسەتىپ، قۇرىلىستىڭ باستالعانىن ايتتى.

تەحنيكالىق تەكسەرۋ بويىنشا جۇمىستاردى «سترويتەحنولوگيا»، «ترانسينجينيرينگ» جانە «گورمونتاجپروەكت» مامانداندىرىلعان ۇيىمدار ساراپشىلارى جۇرگىزىپ جاتىر.

«قازىرگى ۋاقىتتا 117 ءۇيدى بۇزۋ تۋرالى كەلىسىم بار، 81 ءۇي بۇزىلىپ جاتىر. اۋدان اكىمدىگى 101 تەحنيكالىق قۇجات ءبولدى. جوبالىق ۇيىمدار انىقتالدى. اۋماعى 40, 50, 60, 80 جانە 100 شارشى مەتردى قۇرايتىن ءۇي جوبالاۋىنىڭ 5 ءتيپى قۇرىلدى. سونىمەن قاتار 2, 3 جانە 5 پاتەرلى ۇيلەر جوباسى بويىنشا جۇمىستار جۇرگىزىلىپ جاتىر»، - دەلىنگەن حابارلامادا.

وبلىستىق اكىمدىكتىڭ باسپا ءسوز قىزمەتىنىڭ اقپاراتىنشا، زەرتتەلگەن جانە قۇپتالعان 44 ءۇيدى ءسۇرۋ بويىنشا جۇمىس باستالدى. وندا 21 ءۇي تولىق بۇزىلدى.

بيۋدجەتتىڭ قارجىلاندىرۋى ەسەبىنەن قۇرىلىس جۇمىستارىمەن اينالىساتىن 40 قا جۋىق مەردىگەر ۇيىم انىقتالدى.

قۇرىلىستى باقىلايتىن شتاب قۇرىلدى. بۇل جۇمىسپەن «كريستالستروي» ج ش س جانە «ۋكسپروەكت-25006» ج ش س اينالىسادى.

فۋتبولنايا كوشەسىنىڭ بويىنداعى 30№  ءۇيدىڭ ىرگەتاسىن قۇيۋعا وبلىس اكىمى مەن ع. مۇستافين كەنتىنىڭ ەڭ قارت تۇرعىنى نۇرلان جابايەۆ قاتىستى.