ق. توقايەۆ پەن احمەت ۋزيۋمدجيۋ قازاقستاندا حيميالىق قاۋىپسىزدىك ورتالىعىن قۇرۋدىڭ ماڭىزدىلىعىن اتاپ ءوتتى
قازاقستانعا رەسمي ساپارمەن العاش رەت كەلگەن مەيمانمەن كەزدەسۋدە سەنات ءتوراعاسى ايماقتىق جانە حالىقارالىق قاۋىپسىزدىك قۇرىلىمىن قالىپتاستىرۋدا حيميالىق قارۋعا تىيىم سالۋ ۇيىمى ماڭىزدى ءرول اتقاراتىنىن اتاپ ءوتتى. ق. توقايەۆ سيريادا حيميالىق قارۋدى جويۋ اياسىندا الەمدەگى تۇراقتىلىقتى قامتاماسىز ەتۋدە حيميالىق قارۋعا تىيىم سالۋ ۇيىمىنىڭ ءتيىمدى قىزمەتىنە ەرەكشە توقتالدى. «وسىعان بايلانىستى ءسىزدىڭ ۇيىمنىڭ ەڭ بەدەلدى ماراپات - «بەيبىتشىلىكتىڭ نوبەل سىيلىعىمەن» ماراپاتتالۋى الەم قوعامداستىعى تاراپىنان حيميالىق قارۋعا تىيىم سالۋ ۇيىمىنىڭ جەمىستى قىزمەتىنىڭ مويىندالۋى بولىپ تابىلادى»، - دەدى ق. توقايەۆ.
قارۋسىزدانۋ سالاسىنداعى ايماقتاعى قازاقستاننىڭ جەتەكشى ءرولىن اتاپ وتە كەلىپ، ا. ۋزيۋمدجيۋ قازاقستان مەن حيميالىق قارۋعا تىيىم سالۋ ۇيىمى اراسىنداعى ىنتىماقتاستىقتى ورىستەتۋدىڭ زور الەۋەتى بار ەكەنىن ايتتى.
حالىقارالىق كۇن تارتىبىندەگى ماسەلەلەردى تالقىلاعان جۇزدەسۋشىلەر قازاقستاندا حيميالىق قاۋىپسىزدىك ورتالىعىن قۇرۋدىڭ جانە بيىلعى شىلدەدە حيميالىق قارۋعا تىيىم سالۋ ۇيىمىنىڭ بەلسەندى قولداۋىمەن كوماندالىق-شتابتىق جاتتىعۋ وتكىزۋدىڭ ماڭىزدىلىعىن اتاپ ءوتتى.
ق. توقايەۆ سونداي-اق ا. ۋزيۋمدجيۋگە پارلامەنتتىڭ زاڭ شىعارۋ قىزمەتى تۋرالى ايتىپ، ەلىمىزدەگى ىشكى ساياسي جاعدايمەن تانىستىردى.
حيميالىق قارۋعا تىيىم سالۋ ۇيىمىنىڭ باس ديرەكتورى سايلاۋداعى سەنىمدى جەڭىسىنە بايلانىستى پرەزيدەنت ن. نازاربايەۆتى قۇتتىقتاۋىن جەتكىزدى.
اۆتور: سەرىك قاراجان
