قازاقستان قۇراماسىنا ەنبەي قالعان سپورتشىلار وليمپيادادا وزگە ەلدىڭ نامىسىن قورعايدى
ەرمۇرات تاسمۇراتوۆ قازىرگى گرەك-ريم كۇرەسىنەن وزبەكستان قۇراماسىنىڭ كوشباسشىسى
ەكى جىل بۇرىن برازيلياعا كەتكەن قازاقستاندىق بالۋان مارات گاريپوۆ مۇنداي شەشىم قابىلداۋىن «قازاقستان كۇرەسىندە باسەكەلەستىك ارتىپ كەتتى» دەپ تۇسىندىرەدى.
«قازاقستاندا مەنىڭ سالماعىمدا بەس- التى سپورتشى بار. سولارمەن باسەكەلەس بولدىم. قۇرامانىڭ باپكەرلەرى ماعان مۇمكىندىك بەرىپ، ازيا چەمپيوناتىنا اپاردى. ءبىراق ءوزىمدى كورسەتە المادىم. ەشكىمگە وكپەم جوق، برازيلياعا ءوز ەركىممەن كەتتىم»، - دەيدى ول.
مارات گاريپوۆ 2012-جىلعى وليمپياداعا بارا الماعان سوڭ كەز كەلگەن ەلدىڭ ازاماتتىعىن الۋعا دايىن بولعانىن ايتادى.
«ماسكەۋدەگى جارىستاردىڭ بىرىندە برازيليا كۇرەس فەدەراتسياسىنىڭ پرەزيدەنتىمەن سويلەسىپ، سول ەلدىڭ ازاماتتىعىن العىم كەلەتىنىن ايتتىم. ولار 2013-جىلى وزدەرىنە شاقىرىپ، بىرنەشە جارىسقا اپارىپ كوردى. بارىنەن مەدال اكەلدىم»، - دەدى ول ازاتتىققا.
مارات گاريپوۆ جۋىقتا برازيليا قۇراماسىمەن بىرگە سان-پاۋلۋ، ريو-دە-جانەيرودا وتەتىن بىرنەشە جاتتىعۋ جيىندارىنا، ودان كەيىن ەل ىشىندەگى ىرىكتەۋگە قاتىسادى. سول ىرىكتەۋدەن وتسە، 2016-جىلى وتەتىن ريو-دە-جانەيرو وليمپياداسىنا جولداما الماق.
جۋىقتا برازيليا كۇرەس فەدەراتسياسى مارات گاريپوۆتىڭ وسى ەلدىڭ ءتولقۇجاتىن العانىن راستادى.
«سپورتشىنىڭ ارمانى - وليمپياداعا قاتىسۋ».
قازاقستان قۇراماسىنا ەنە الماعان سوڭ شەتكە كەتكەن سپورتشىلاردىڭ ءبىرى - شىمكەنتتىك بالۋان ەرمۇرات تاسمۇراتوۆ. ول - قازىر گرەك-ريم كۇرەسىنەن وزبەكستان قۇراماسىنىڭ كوشباسشىسى. 23 جاستاعى بالۋان ازاتتىققا بەرگەن سۇحباتىندا 2008-جىلى داۋلەت تۇرلىحانوۆ اتىنداعى تۋرنيردە جەڭىلىپ، وليمپياداعا قاتىسۋ مۇمكىندىگىنەن ايىرىلعانىن، كەيىن الەمدىك جارىستارعا بارۋ ءۇشىن وزبەكستان ازاماتتىعىن العانىن ايتقان. ول 2013-جىلى بۋداپەشتە وتكەن الەم چەمپيوناتىنا وزبەكستان اتىنان قاتىسىپ، قازاقستان ۇلتتىق قۇراماسىنىڭ بالۋانى المات كەبىسپايەۆتى جەڭىپ قولا مەدال الدى. ەرمۇرات تاسمۇراتوۆ 2014-جىلى استانادا ازيا چەمپيونى بولدى. ول بيىل تاشكەنتتە وتكەن الەم بىرىنشىلىگىندە قولا مەدال ۇتتى.
قوستانايلىق بوكسشى، 27 جاستاعى اسلان مۇقانوۆ تا الەمدىك دەڭگەيلەردەگى جارىسقا قاتىسۋ ءۇشىن وزگە ەل ازاماتى بولعان. ول - 2010-جىلعى 57 كيلوگرام سالماقتا قازاقستان چەمپيونى اتانىپ، ا ق ش- تا وتكەن اسكەريلەر اراسىنداعى الەم چەمپيوناتىندا كۇمىس جۇلدەگە يە بولعان سپورتشى. 2012-جىلى كاتار ازاماتتىعىن العان اسلان مۇقانوۆ «الەم بىرىنشىلىگى مەن ازيا چەمپيوناتتارىنا قاتىسقىسى كەلگەنىن، ءبىراق قازاقستاندا ونداي مۇمكىندىك بولماعانىن» مالىمدەگەن.
اقتوبەلىك بالۋان ەربول قالابايەۆتىڭ (27 جاستا) ەلدەن كەتۋ سەبەبى دە جوعارىداعى سپورتشىلاردىكىنە ۇقساس. ول 60 كيلوگرام سالماقتا ەكى رەت (2007, 2008) جاستار اراسىندا قازاقستان چەمپيونى اتانعان، 2009-جىلى گرەك-ريم كۇرەسىنەن قازاقستان چەمپيوناتىنىڭ كۇمىس جۇلدەسىن العان. ول 2010-جىلى گرەك-ريم كۇرەسىنەن قازاقستان ۇلتتىق قۇراماسىنا ءىلىنىپ، باكۋدەگى گران-پري جارىسىنا قاتىسقانىمەن، جۇلدەلى ورىنعا ىلىنبەگەن. قازاقستاندا گرەك-ريم كۇرەسىندە 60 كيلوگرام سالماق كاتەگورياسى بويىنشا ىشكى باسەكە كۇشەيگەن كەزدە ەربول قالابايەۆ ۇلتتىق قۇرامادان شىعىپ قالدى. كەيىن ول بەلارۋس قۇراماسىنا قوسىلعان.
2013-جىلى قازاقستان قۇراماسى ساپىندا جاستار اراسىنداعى الەم چەمپيونى اتانعان اۋىر اتلەت اناستاسيا شۆاباۋەر (قازىرگى تەگى - يبراگيملي) - ەندى ازەربايجان سپورتشىسى. 21 جاستاعى اتلەت 2015-جىلى ازەربايجان چەمپيوناتىندا التىن الىپ، سول ەلدىڭ قۇراماسىنا ەنگەن. ول بيىل گرۋزيادا وتكەن ەۆروپا چەمپيوناتىندا 69 كيلوگرام سالماق دارەجەسىندە قولا جۇلدەگە يە بولدى. اناستاسيا شۆاباۋەر - 2010-جىلى قازاقستان جاسوسپىرىمدەر قۇراماسى ساپىندا ازيا چەمپيونى اتانعان، 2014-جىلى قازاقستان ۇلتتىق قۇراماسىنا كىرىپ، استانادا وتكەن ازيا بىرىنشىلىگىندە بەستىككە ەنگەن.
بوكستان اقتوبە قۇراماسىنىڭ مۇشەسى بولعان كامران شاحسۋۆارلى (75 كيلوگرام) دا 2013-جىلى ازەربايجان ازاماتى اتانعان. ول سول ەلدىڭ چەمپيوناتىندا التىن، ال 2014-جىلى يۋگرادا (رەسەي) وتكەن مۇنايلى ەلدەر اراسىنداعى الەم كۋبوگىندا ەكىنشى ورىن يەلەنگەن. شاحسۋۆارلى باكۋدە وتكەن «ۇلى جىبەك جولى» جارىسىندا قازاقستان قۇراماسىنىڭ مۇشەسى ساپارباي ايداروۆتى جەڭىپ، چەمپيون اتاندى. قازىر شاحسۋۆارلى ازەربايجان قۇراماسىنىڭ ساپىندا جاتتىعىپ ءجۇر.
شەتەلگە كەتكەن قازاقستاندىق سپورتشىلاردىڭ ءبىرى - 69 كيلوگرامدىق سالماقتا قازاقستان چەمپيوناتىن ۇتقان يانا مىسلەيكو (قازىرگى فاميلياسى - كوندراشيەۆا). ول بيىل گرۋزيادا وتكەن ەۆروپا چەمپيوناتىنا رەسەيدىڭ اتىنان قاتىسىپ، كۇمىس مەدال يەلەنگەن.
سپورت جۋرناليسى اسقار اعاتايەۆتىڭ پىكىرىنشە، جانكۇيەرلەر قازاقستاندىق سپورتشىلاردىڭ باسقا ەلدەرگە كەتۋىن دۇرىس قابىلداۋى كەرەك.
«بۇل قازاقستان سپورتشىلارىنىڭ شەتەلگە كەتۋىنىڭ باسى عانا سياقتى. سەبەبى اۋىر اتلەتيكا، بوكستان ءار ەل وليمپياداعا تەك 10 سپورتشى اپارا الادى. ال قازاقستاندا وليمپياداعا قاتىسۋعا لايىقتى سپورتشىلار كوپ. كەز كەلگەن سپورتشىنىڭ ارمانى - وليمپياداعا قاتىسۋ. ولار ءوز ەلىنىڭ قۇراماسىنا ەنبەي قالسا، وليمپياداعا قاتىسۋدىڭ باسقا جولىن ىزدەيتىنى انىق»، - دەيدى جۋرناليست.
2016-جىلعى جازعى وليمپيادا 5-21- تامىزدا برازيليانىڭ ريو-دە-جانەيرو قالاسىندا وتەدى. ال وليمپياداعا ىرىكتەۋ جارىستارى باستالىپ كەتتى.
