اقتاۋعا دەيىن قازاقستاننىڭ بارشا اۋماعىمەن تەمىر جول جەلىسىن سالۋ كەرەك - پرەزيدەنت

استانا. قازاقپارات - مۋلتيمودالدى، جوعارى جىلدامدىقتى «ەۋرازيالىق ترانسكونتينەنتالدى ءدالىز» قۇرىلۋى ءتيىس.

بۇگىن اقوردادا ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ وسىلاي ءمالىم ەتتى.

«مۋلتيمودالدى، جوعارى جىلدامدىقتى «ەۋرازيالىق ترانسكونتينەنتالدى ءدالىز» قۇرىلۋى ءتيىس. بۇل تۇرعىدا قىتايدا نەمەسە جاپونياداعى ساعاتىنا 350 شاقىرىم جىلدامدىقپەن ءجۇرۋدى ايتىپ تۇرعانىم جوق. ياعني، جولداعى ءتۇرلى قولدان جاسالعان كەدەرگىلەردى جويۋ كەرەك»، - دەدى ەلباسى.

ونىڭ ايتۋىنشا، ەۋرازيالىق ءدالىز ەكى باعىت بويىنشا وتەدى. ءبىرىنشىسى، قازاقستان اۋماعى ارقىلى رەسەيگە جانە ارى قاراي ەۋروپاعا، ال ەكىنشىسى، «قورعاستان» باستاپ قازاقستان اۋماعىمەن «اقتاۋ» پورتىنا دەيىن، ودان ارى كاسپي تەڭىزىمەن كاۆكاز بەن ەۋروپاعا، سونداي-اق وڭتۇستىككە يران ارقىلى پارسى شىعاناعىنا باعىتتالعان.

پرەزيدەنت جوبا اياسىندا «اقتاۋ» تەڭىز پورتىنا دەيىن قازاقستاننىڭ بارشا اۋماعىمەن جاڭا تەمىر جولى جەلىسىن سالۋ كەرەكتىگىن اتاپ ءوتتى. بۇل ورايدا قىتاي شەكاراسىنان تىكەلەي سالىناتىن بۇل جول جونىندە ءتيىستى كەلىسسوزدەر باستالعانىن ايتا كەتكەن ءجون.

اۆتور: قانات مامەتقازى ۇلى