ەلباسى: قازاقستان مەن قىتاي شەكاراسىندا كەدەندىك ستاۆكالاردىڭ تەك ۇشەۋىن قالدىرۋ قاجەت

استانا. قازاقپارات - قازاقستان مەن قىتاي شەكاراسىندا كەدەندىك ستاۆكالاردىڭ تەك ۇشەۋىن قالدىرۋ قاجەت. بۇل تۋرالى بۇگىن اقوردادا ءوتىپ جاتقان ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ ايتتى.

ەلباسى ءوز سوزىندە قازاقستان مەن قىتاي شەكاراسىندا جۇك پويىزدارىنىڭ وتۋىندە كەدەرگىلەردىڭ بار ەكەندىگىن، بۇل ماسەلەنى تۇبەگەيلى شەشۋ قاجەتتىگىن اتاپ، ول ءۇشىن كەدەندىك ستاۆكالار سانىن قىسقارتۋ قاجەتتىگىنە نازار اۋدارتتى.

«كەدەندىك ستاۆكالاردىڭ سانىن قىسقارتۋ ماسەلەسىن قاراستىرعان ءجون. تەك ۇشەۋىن عانا قالتىرۋ قاجەت - 0, 5, 12. بۇل كەدەندىك رەتتەۋدىڭ اشىقتىعىن قامتاماسىز ەتەدى، اكىمشىلەۋدى جاقسارتادى، جەمقورلىقتىڭ تامىرىنا بالتا شابادى»، - دەدى مەملەكەت باسشىسى.

ق ر پرەزيدەنتى بۇل ماسەلەنى ەندىگى ۋاقىتتا ەۋرازيالىق ەكونوميكالىق وداقپەن بىرلەسىپ تالقىلاۋ قاجەتتىگىن باسا ايتتى.

«ءبىز، سونىمەن قاتار، ءبىر تەرەزە قاعيداتىن ەنگىزۋدى، كەدەندىك جانە سالىق جۇيەلەرىن ينتەگراتسيالاۋدى ىلگەرىلەتە بەرەتىن بولامىز» - دەدى ەلباسى.

اۆتور: مارلان جيەمباي