پرەزيدەنت ۇكىمەتكە «عىلىمدى كوممەرتسيالاندىرۋ تۋرالى» زاڭ جوباسىن شۇعىل ازىرلەۋدى جۇكتەدى

استانا. قازاقپارات - «عىلىمدى كوممەرتسيالاندىرۋ تۋرالى» زاڭ جوباسىن ازىرلەۋدى شۇعىل باستاۋ كەرەك.

بۇل تۋرالى بۇگىن اقوردادا ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ وسىلاي ءمالىم ەتتى.

«وندىرىستەردە يننوۆاتسيالاردى ەنگىزۋگە ەرەكشە ءمان بەرىلۋى ءتيىس. ۇكىمەتكە «عىلىمدى كوممەرتسيالاندىرۋ تۋرالى» زاڭ جوباسىن ازىرلەۋدى شۇعىل باستاۋدى تاپسىرامىن»، - دەدى پرەزيدەنت.

مەملەكەت باسشىسى نازاربايەۆ ۋنيۆەرسيتەتىندەگى زەرتحانالاردا عىلىمي جۇمىستار ءجۇرىپ جاتقاندىعىن، وسى ۋنيۆەرسيتەتتىڭ شەتەلدىك عىلىمي جۋرنالدارداعى جاريالىمدارى وزگە وقۋ ورىندارىنان اسىپ تۇسكەنىن اتاپ ءوتتى.

«بۇدان ارى قاراي بۇل زەرتتەمەلەر وندىرىسكە بارۋى ءتيىس. قازىر ۋنيۆەرسيتەت جانىنان وندىرىستىك ۋچاسكە قۇرىلۋدا. ال وسىدان كەيىن ونى كوممەرتسياعا قالاي وتكىزەمىز؟»، - دەپ توقتالدى ەلباسى.

اۆتور: مارلان جيەمباي