شامعون قاجىعاليەۆ قازاقتىڭ كاسىبي مۋزىكاسىن جوعارى دارەجەگە كوتەردى - ن. ءنۇسىپجانوۆ

الماتى. قازاقپارات - شامعون قاجىعاليەۆ قازاقتىڭ كاسىبي مۋزىكاسىن جوعارى دارەجەگە كوتەردى. ونى بۇكىل الەمگە تانىتتى.

بۇل تۋرالى بۇگىن الماتىدا ك س ر و حالىق ءارتىسى، مەملەكەتتىك سىيلىقتىڭ لاۋرەاتى، ايگىلى ديريجەر شامعون قاجىعاليەۆتى اقتىق ساپارعا شىعارىپ سالۋعا ارنالعان ازالى جيىن بارىسىندا قازاقستاننىڭ حالىق ءارتىسى، مەملەكەتتىك سىيلىقتىڭ يەگەرى نۇرعالي ءنۇسىپجانوۆ ايتتى.

 «مەن وتىز جىلعا جۋىق قۇرمانعازى وركەسترىمەن جۇمىس ىستەپ ەدىم. شاكەڭ باس ديريجەر بولدى. وركەسترمەن تالاي رەت شەت ەلدەردە گاسترولدە بولدىق. شامعون قازاقتىڭ كاسىبي مۋزىكاسىنا كوپ ەڭبەك سىڭىرگەن ادام. قازىر قازاقتىڭ كاسىبي مۋزىكاسىن ماقتانىپ ايتاتىنداي دارەجەگە جەتتىك. ونىڭ مۇنداي بيىككە كوتەرىلۋىنە شامعون اعانىڭ سىڭىرگەن ەڭبەگى وراسان زور. ونىڭ ونەگەلى ءومىرى دە ونەرى دە بۇگىنگى ۇرپاققا ۇلگى بولا الادى»، - دەدى ن. ءنۇسىپجانوۆ.

 «تىلسىم تابيعاتتىڭ ءوزى قىزىق قوي. مىناۋ ونەر بولسىن، ادەبيەت بولسىن، مادەنيەت بولسىن، عىلىم بولسىن، تابيعاتتىڭ دارىندىلىقتى، جارقىندىقتى ۋىستاپ بەرە سالاتىن كەزى بولادى. بۇل تۇرعىدا قازاق حالقى ءۇشىن ءان، كۇي ونەرى جاعىنان 18-19 - عاسىردىڭ ورنى ەرەكشە. ال 20 - عاسىردا قازاق دالاسىندا جاڭا ونەردىڭ ساڭلاقتارى دۇنيەگە كەلدى. كەشە مەن اتاقتى ونەر مايتالماندارى فۋات مانسۇروۆ، بولات سارىبايەۆ، عابيدوللا تاستانوۆ، فاتيما بالعايەۆا، قۇبىش مۇحيتوۆ جانە شامعون قاجىعاليەۆ تۇسكەن سۋرەتتى كوردىم. ولار ءبىر كۋرستا وقىعان. شامعون اعانى سول ساڭلاقتاردىڭ سوڭعى تۇياعى دەسە دە بولادى»، - دەدى ق ر مادەنيەت قايراتكەرى، رەسپۋبليكالىق جانە حالىقارالىق بايقاۋلاردىڭ لاۋرەاتى، ونەر زەرتتەۋشىسى، «كوكىل» مەكتەبىنىڭ ديرەكتورى ابدولحاميت رايىمبەرگەنوۆ.

شامعون اعانىڭ شاكىرتى ق ر ەڭبەك سىڭىرگەن ءارتىسى، ديريجەر جالعاسبەك بەگەندىكوۆ ۇستازىنىڭ ءىسىن ءارى قاراي جالعاستىرۋعا كۇش سالاتىندىعىن جەتكىزدى.

«شامعون قاجىعاليەۆ قازاقتىڭ ۇلى جانە دارابوز ديريجەرى. ول قۇرمانعازى وركەسترىنىڭ ءوزىن جارتى عاسىرعا جۋىق ۋاقىت باسقارىپ كەلدى. سونداي- اق، باسقا دا وركەسترلەرگە باسشىلىق جاسادى. كوپ جىلدار كونسەرۆاتوريادا پروفەسسور بولىپ ەڭبەك ەتتى. تاماشا ۇستاز. ءبىز سول كىسىنىڭ شاكىرتتەرىمىز. سوندىقتان شامعون اعانىڭ جاساعان ءىسىن ودان ءارى جالعاستىرۋعا ءتيىسپىز»، - دەدى ج. بەگەندىكوۆ.

اۆتور: جاپپاربەرگەن ايبوتا