كەڭەس وداعىنىڭ باتىرى اتاعىن الا الماعان قازاق جاۋىنگەرلەرى تۋرالى كىتاپ جارىققا شىقتى

استانا. قازاقپارات - بۇگىن ق ر ۇلتتىق مۋزەيىندە قاراعاندى وبلىسى اكىمىنىڭ ورىنباسارى، ساياسي عىلىمداردىڭ دوكتورى بەرىك ءابدىعالي ۇلى «ۇمىتىلعان باتىرلار. كەڭەس وداعىنىڭ باتىرلارى» اتتى جاڭا كىتاپتى تانىستىردى.  

كىتاپ 10 باتىر سونىڭ ىشىندە، كەڭەس وداعىنىڭ باتىرى اتاعىنا ۇسىنىلىپ، ءبىراق تۇسىنىكسىز جاعدايلارعا بايلانىستى اتاقتى الا الماعان 9 قازاق جاۋىنگەرى تۋرالى جازىلعان.

 قۇجاتتار 2010 - جىلى مەملەكەتتىك ءتىلدى قولداۋ قورىنىڭ ۇيىتقىسىمەن باستالعان «حالىق باتىرى» اتتى شارا اياسىندا جيناقتالدى. رەسەيدىڭ قورعانىس مينيسترلىگى مۇراعاتتارىنان تابىلعان بىرەگەي قۇجاتتاردىڭ باسىم بولىگى العاش رەت جارىققا شىعىپ وتىر.

«جيناقتا ايتىلىپ وتىرعان باتىرلار تۋرالى ولاردىڭ تۋىستارىنان باسقا ەشكىم دە بىلمەيدى. ولاردىڭ ەسىمدەرى كوشە، مەكتەپ اتاۋلارىنا بەرىلگەن جوق. سوعىستا بىرگە بولعان مايدانداس جاۋىنگەرلەرى مويىنداعان ولاردىڭ قايسارلىعى، شتابتىق نەمەسە پارتيالىق باسشىلىق تاراپىنان ەلەنبەدى. تاريحي ادىلدىك ءۇشىن ولاردىڭ ەسىمدەرىن قايتا جاڭعىرتۋ كەرەك»، - دەيدى ب. ءابدىعالي ۇلى.

كىتاپتا ۇسىنىلعان فاكتىلەر شىنىمەن وقىرمان نازارىن وزىنە اۋدارارى ءسوزسىز. ولاردىڭ كوزسىز باتىرلىعى تاڭقالدىرماي قويمايدى. مىسالى، ماڭعىستاۋ ءوڭىرىنىڭ تۋماسى يساتاي سۇيەبايدىڭ ماراپات پاراعىندا 1942 -جىلى 20 - قاراشادا ول اۆتوماتپەن 182 فاشيستتى جەر جاستاندىردى دەپ جازىلعان.

ونىڭ ۇستىنە وعى تاۋسىلعان يساتاي تانكيستەر بەرىپ وتىرعان گراناتالارمەن تاعى 100 گە تارتا نەمىستىڭ كوزىن جويادى. وسى وقيعادان كەيىن جەكە قۇرام باسشىلىعى ونى كەڭەس وداعىنىڭ باتىرى اتاعىنا بىردەن ۇسىنادى. الايدا، جوعارى جاقتان وعان تەك لەنين وردەنى تابىستالادى.

قالعان جاۋىنگەرلەردىڭ باتىرلىعى بۇدان كەم ەمەس. كىتاپتا 10 جاۋىنگەردىڭ ەرلىگى سۋرەتتەلەدى. ءبىراق ونىڭ بىرەۋى كەڭەس وداعىنىڭ باتىرى اتاعىنا ۇسىنىلماعان. دەگەنمەن، ونىڭ سوعىستا كورسەتكەن جەتىستكتەرى قازىر دە اڭىز بولىپ قالدى. ول - تولەۋعالي ابدىبەكوۆ. جاۋدىڭ قالىڭ قولى ودان قاتتى ۇركەتىن جانە «قارا تاجال» دەپ اتاپ كەتتى. ابدىبەكوۆ كەڭەس وداعىنىڭ ەڭ ناتيجەلى سنايپەرلەرىنىڭ 20 لىعىنا ەندى. ونىڭ وعىنان 397 فاشيست قازا بولدى. كەڭەس وداعىنىڭ باتىرى اتاعىنا ۇسىنىلماۋدىڭ باستى سەبەبى - ابدىبەكوۆ ءوزىنىڭ انكەتاسىندا نەمەرە اعاسى كەمەلبايدىڭ رەپرەسسياعا ۇشىراعانىن اشىق جازعانى بولدى.   

 بەرىك ءابدىعالي ۇلىنىڭ ايتۋىنشا، كىتاپ قالىڭ وقىرمانعا ارنالادى جانە بارىنشا كوپ تيراجبەن شىعادى.

 اۆتور:   جاسۇلان جولدىبايەۆ