اقمولا وبلىستىق ءماسليحاتى ءوڭىر باسشىسى لاۋازىمىنا ەلباسى ۇسىنعان س. كۋلاگيننىڭ كانديداتۋراسىن ءبىراۋىزدان قولدادى
سەسسياعا ءماسليحاتتىڭ 32 دەپۋتاتىنىڭ 28 ءى قاتىستى، 4 دەپۋتات بەلگىلى سەبەپتەرمەن قاتىسا المادى.
سەسسيا بارىسىندا اقمولا وبلىستىق ءماسليحاتىنىڭ 5-شاقىرىلىمىنىڭ حاتشىسى سەسسياعا قاتىسۋشىلارعا مەملەكەت باسشىسىنىڭ ۇسىنىسىن وقىپ ءوتتى.
بۇدان كەيىن وبلىستىق ءماسليحاتتىڭ تۇراقتى كوميسسياسىنىڭ ءتوراعاسى، ءماسليحات دەپۋتاتى سەرىك اياعانوۆ ايماقتىڭ كوركەيۋى مەن الەۋمەتتىك-ەكونوميكالىق دامۋىنا سەرگەي كۋلاگيننىڭ قوسقان ۇلەسىنىڭ ولشەۋسىز ەكەندىگىن اتاپ ءوتتى.
«ءبىز سىزدەرمەن بىرگە ەلىمىزدەگى ۇلكەن ساياسي وقيعانىڭ كۋاسى بولىپ وتىرمىز. مەرزىمنەن تىس پرەزيدەنت سايلاۋى، ونداعى ەلباسى ن. نازاربايەۆتىڭ ايقىن جەڭىسى مەن ساياسي باعىتىن بۇكىل قازاقستاندىقتاردىڭ ءبىراۋىزدان قولداۋى، ۇلىقتاۋ راسىمىندەگى پرەزيدەنتتىڭ ءسوزى ونىڭ ەلىمىزدەگى تۇراقتىلىق پەن گۇلدەنۋدىڭ كەپىلى بولاتىنىن بىلدىرەدى.
ارينە، ەلباسىنىڭ جۇمىسىنىڭ ويداعىداي ءساتتى بولۋى كوپ جاعدايدا سەرگەي كۋلاگين سياقتى ونىڭ جاقتاستارى مەن نيەتتەستەرىنىڭ قولداۋىنا بايلانىستى. قۇرمەتتى ارىپتەستەر دەپۋتاتتار كورپۋسى اتىنان مەملەكەت باسشىسى نۇرسۇلتان نازاربايەۆتىڭ اقمولا وبلىسىنىڭ اكىمى قىزمەتىنە سەرگەي كۋلاگيندى قايتا تاعايىنداۋ جونىندەگى ۇسىنىسىن قولداۋعا رۇقسات ەتىڭىزدەر»، - دەدى ءوز سوزىندە سەرىك اياعانوۆ.
وسىلايشا، ءماسليحات دەپۋتاتتارى وبلىس اكىمىنىڭ لاۋازىمىنا مەملەكەت باسشىسى نۇرسۇلتان نازاربايەۆ ۇسىنعان سەرگەي كۋلاگيننىڭ كانديداتۋراسىن ءبىراۋىزدان قولدادى.
كۋلاگين سەرگەي ۆيتاليەۆيچ 1952-جىلى تۋعان. سەلينوگراد اۋىل شارۋاشىلىق ينستيتۋتىن، الماتى جوعارعى پارتيا مەكتەبىن بىتىرگەن. ساياسي عىلىمداردىڭ كانديداتى.
ەڭبەك جولىن 1966-جىلى سەلينوگراد وبلىسى، استراحان اۋدانى، نيكولايەۆ كەڭشارىنىڭ جۇمىسشىسى بولىپ باستادى.
1981-جىلعى قازاندا استراحان اۋدانى قىزىلجار كەڭشارىنىڭ ديرەكتورى بولىپ تاعايىندالدى.
1984-جىلعى قازاننان باستاپ الەكسەيەۆسك اۋداندىق حالىق دەپۋتاتتارى كەڭەسى اتقارۋشى كوميتەتىنىڭ ءتوراعاسى، اۋداندىق كوميتەتىنىڭ ءبىرىنشى حاتشىسى، كەيىن 1986-جىلعى قازاننان باستاپ سەلينوگراد وبلىستىق اتقارۋشى كوميتەتى ءتوراعاسىنىڭ ءبىرىنشى ورىنباسارى، 1990-جىلعى جەلتوقساننان باستاپ تورعاي وبلىستىق حالىق دەپۋتاتتارى كەڭەسى اتقارۋشى كوميتەتىنىڭ ءتوراعاسى قىزمەتتەرىن اتقاردى. 1992-جىلعى اقپاندا تورعاي وبلىستىق اكىمشىلىگىنىڭ باسشىسى بولىپ تاعايىندالدى.
1993-جىلعى ماۋسىم مەن 1994-جىلعى ماۋسىم ارالىعىندا - ق ر پرەمەر-ءمينيسترىنىڭ ورىنباسارى، ق ر اۋىل شارۋاشىلىعى ءمينيسترى. 1994-جىلعى شىلدە مەن قازان ارالىعىندا - ق ر پرەمەر-ءمينيسترىنىڭ ورىنباسارى.
«ينتەگراتسيا- سەلينا» حالىقارالىق قورىنىڭ پرەزيدەنتى بولعان. 1998-جىلعى قاڭتار مەن قىركۇيەك ارالىعىندا - ق ر اۋىل شارۋاشىلىعى ءمينيسترى.
1998-جىلعى قىركۇيەكتەن باستاپ 2004-جىلعى ناۋرىز ارالىعىندا - اقمولا وبلىسىنىڭ اكىمى، 2004-جىلعى ناۋرىز بەن 2012-جىلعى قاڭتار ارالىعىندا - قوستاناي وبلىسىنىڭ اكىمى.
2012-جىلعى قاڭتاردان باستاپ 2014-جىلعى مامىر ارالىعىندا - ق ر پارلامەنتى سەناتىنىڭ دەپۋتاتى.
2014-جىلعى مامىردا قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ جارلىعىمەن اقمولا وبلىسىنىڭ اكىمى بولىپ تاعايىندالدى.
«وتان»، ІІ جان Ⅲ دارەجەلى «بارىس» وردەندەرىمەن، مەدالدارمەن جانە مەرەيتوي مەدالدارىمەن ناگرادتالعان.
اۆتور: اسلان وسپانوۆ
