ەلوردالىق ءماسليحات دەپۋتاتتارى ادىلبەك جاقسىبەكوۆتىڭ كانديداتۋراسىن قولدادى
كۇن تارتىبىنە ەلوردا اكىمىن تاعايىنداۋ ماسەلەسى شىعارىلدى، دەپ حابارلايدى اكىمدىكتىڭ رەسمي سايتى.
سەسسيا بارىسىندا حالىق قالاۋلىلارى مەملەكەت باسشىسىنىڭ استانا قالاسىنىڭ اكىمى قىزمەتىنە ادىلبەك جاقسىبەكوۆتى تاعايىنداۋ تۋرالى ۇسىنىسىن ءبىراۋىزدان قولدادى.
«ەڭ الدىمەن، كورسەتىلگەن سەنىم ءۇشىن العىس ايتقىم كەلەدى. سونداي-اق، مەملەكەت باسشىسىنىڭ سايلاۋداعى جەڭىسىمەن بارلىقتارىڭىزدى قۇتتىقتايمىن. الدا ۇلكەن جۇمىستار كۇتىپ تۇر. وزدەرىڭىز بىلەتىندەي، پرەزيدەنت بەس ينستيتۋتسيونالدى رەفورمانى جاريالادى. ولاردى جۇزەگە اسىرۋ ءۇشىن بارلىعىمىز بىردەي جۇمىلۋىمىز قاجەت. ەلوردانىڭ كورىكتى كەلبەتىن ودان ءارى قالىپتاستىرىپ، ەلباسىنىڭ باعدارلامالارىن ىسكە اسىرۋىمىز كەرەك»، - دەدى اكىم.
ادىلبەك جاقسىبەكوۆ 1954-جىلى 26- شىلدەدە قوستاناي وبلىسى قارابالىق اۋدانىنىڭ ءبورىلى اۋىلىندا تۋعان.
1977-جىلى بۇكىلوداقتىق مەملەكەتتىك كينەماتوگرافيا ينستيتۋتىنىڭ (ماسكەۋ قالاسى) ەكونوميكا فاكۋلتەتىن بىتىرگەن، 1987-جىلى پلەحانوۆ اتىنداعى ماسكەۋ حالىق شارۋاشىلىعى ينستيتۋتىندا «ماتەريالدىق-تەحنيكالىق جابدىقتاۋدى ۇيىمداستىرۋشى» ماماندىعى بويىنشا قايتا دايارلاۋدان ءوتتى. ەكونوميكا عىلىمدارىنىڭ كانديداتى.
قازاق ك س ر مەملەكەتتىك كينو جانە مەملەكەتتىك جابدىقتاۋ جۇيەسىندە جۇمىس ىستەدى، ءبىرقاتار كاسىپورىنداردى باسقارعان.
1988-1995-جىلدارى «سەسنا» كوپ سالالى كورپوراتسياسىن باسقاردى. 1995-جىلى قازاقستان رەسپۋبليكاسى پارلامەنتىنىڭ سەناتىنا سايلاندى. 1996-جىلى اقمولا وبلىسى اكىمىنىڭ ءبىرىنشى ورىنباسارى بولىپ تاعايىندالادى. 1997-2003-جىلدارى - استانا قالاسىنىڭ اكىمى. 2003-2004-جىلدارى قازاقستان رەسپۋبليكاسىنىڭ يندۋستريا جانە ساۋدا ءمينيسترى. 2004-2008-جىلدارى قازاقستان رەسپۋبليكاسى پرەزيدەنتى اكىمشىلىگىنىڭ باسشىسى. 2008-جىلعى قاڭتار - قازان ارالىعىندا «نۇر وتان» حالىقتىق- دەموكراتيالىق پارتياسى ءتوراعاسىنىڭ ءبىرىنشى ورىنباسارى - ق ر پرەزيدەنتىنىڭ كەڭەسشىسى.
2008-2009 -جىلدارى رەسەي فەدەراتسياسىنداعى قازاقستان رەسپۋبليكاسىنىڭ توتەنشە جانە وكىلەتتى ەلشىسى بولدى. 2009-2014-جىلار ارالىعىندا قازاقستان رەسپۋبليكاسىنىڭ قورعانىس ءمينيسترى. 2014-جىلعى 3- ساۋىردە مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ مەملەكەتتىك حاتشىسى بولىپ تاعايىندالدى. 2014-جىلى 22- قازاندا استانا قالاسىنىڭ اكىمى بولىپ تاعايىندالدى.
2008-جىلى استانا قالاسىنداعى «دوڭگەلەك الاڭ» ارحيتەكتۋرالىق كەشەنى ءۇشىن قازاقستان رەسپۋبليكاسى مەملەكەتتىك سىيلىعىنىڭ لاۋرەاتى اتاندى.
«قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ»، II جانە III دارەجەلى «بارىس»، III دارەجەلى «كنياز ياروسلاۆ مۋدرىي» (ۋكراينا) وردەندەرىمەن جانە مەدالدارمەن ناگرادتالعان. «زاجەچ زۆەزدۋ-ستوليتسۋ»، «تاك ناچينالاس استانا. زاپيسكي پەرۆوگو اكيما ستوليتسى» كىتاپتارىنىڭ اۆتورى.
