شۆەيتساريالىق بانكتەر جارتى عاسىر بويى پايدالانىلماعان مىڭداعان ەسەپشوتتار تۋرالى حابارلادى
الايدا بانكيرلەر بۇل ەسەپشوتتاردىڭ ناتسيستەرگە ەشقانداي قاتىسى جوق ەكەنىن ايتادى.
Reuters اگەنتتىگىنىڭ حابارلاۋىنشا، بۇل اقپاراتتى اشۋعا شۆەيتسارلىق بانكتەردى 60 جىلدان استام ۋاقىت بۇرىن اشىلعان جانە ءبىراق تا سوڭعى ەلۋ جىلدا پايدالانىلماعان ەسەپشوتتار تۋرالى حابارلاۋ جونىندەگى جاڭا زاڭ ماجبۇرلەدى.
شۆەيتساريا بانكتەرى قاۋىمداستىعىنىڭ رەسمي وكىلى جۋرناليستەرگە اڭگىمە ەل ازاماتتارىنىڭ عانا ەمەس، شەتەلدىكتەردىڭ دە ەسەپشوتتارى تۋرالى بولىپ وتىرعانىن ۇقتىردى. ءبىراق ول بۇل ارادا ناتسيستەردىڭ سالىمدارىمەن ەشقانداي بايلانىس جوق ەكەنىن اتاپ كورسەتتى.
Welt am Sonntag باسىلىمىنىڭ مالىمەتتەرى بويىنشا، 1940-جىلى گەرمانيا ازاماتى اشقان ءبىر ەسەپشوت قانا كۇمان تۋعىزدى. وندا 1000 شۆەيتسارلىق فرانك ساقتالعان.
بۇكىل الەمدىك ەۆرەي كونگرەسى شۆەيتسارلىق بانكتەردىڭ پايدالانىلماعان ەسەپشوتتار تۋرالى مالىمەتتەردى اشۋىن تالاپ ەتىپ كەلەدى، ولار مۇنداي ەسەپشوتتاردا ناتسيستىك گەرمانيانىڭ بۇرىنعى باسشىلارىنىڭ اقشالارى بولۋىنان ءۇمىتتەنەدى، سونىڭ ارقاسىندا حولوكوست قۇرباندارىنا وتەماقى تولەۋ مۇمكىندىگى تۋىندار ما ەكەن دەپ دامەلى.
شۆەيتساريالىق بانكتەر كوپتەگەن ونداعان جىلدار بويى وزدەرىنىڭ سالىمشىلارى تۋرالى اقپاراتتى قۇپيا ساقتاي بىلۋىمەن داڭقى شىققان بولاتىن، بۇل سالىقتاردان كىرىستەرىن جاسىرعانداردى ىزدەۋمەن اينالىساتىن ۇيىمداردىڭ نارازىلىعىن تۋعىزۋدا.
