08:55, 04 - مامىر 2015 | GMT +5
اسابا ۇيلەنۋ تويى كەزىندە قالىڭدىقتىڭ ايفونى مەن اشەكەيلەرىن ۇرلاپ كەتتى
استانا. قازاقپارات - چۋۆاشيا پوليتسياسى ۇيلەنۋ تويى كەزىندە قالىڭدىقتىڭ ايفونى مەن قىمبات اشەكەيلەرىن ۇرلاپ كەتكەن تاتارستاننان كەلگەن اساباعا قارسى قىلمىستىق ءىس قوزعادى.
بۇل تۋرالى رەسپۋبليكالىق ءى ءى م سايتىندا جاريالانعان، دەپ حابارلادى Lenta.ru.
«زارداپ شەگۋشىلەر وتكەن جىلعى تامىز ايىنىڭ سوڭىندا ۇيلەنۋ تويى ۇستىندە قالىڭدىقتىڭ التىن اشەكەيلەرى سالىنعان قول سومكەسى مەن ايفونى ۇرلانعانى تۋرالى پوليتسياعا شاعىمدانعان»، - دەلىنگەن حابارلامادا.
كەلتىرىلگەن زالال 50 مىڭ رۋبلدەن اسقان.
تەرگەۋ امالدارىن جۇرگىزۋ ناتيجەسىندە كۇدىكتەلگەن تاتارستاندىق 24 جاستاعى ءارتىس چۋۆاشياعا ايداۋىلمەن جەتكىزىلدى، سول جەردە ول ۇرلانعان سمارتفوندى يەسىنە تاپسىردى.
