سەيسمولوگتار نەپالدا تاعى جەر سىلكىنىستەرى بولۋى مۇمكىن دەگەن بولجام جاساۋدا

استانا. قازاقپارات - نەپال، ءۇندىستان جانە قىتايدا تاعى دا جەر سىلكىنىستەرى ورىن الۋى مۇمكىن، دەگەن مالىمدەمە جاسادى ا ق ش- تىڭ ستەنفورد ۋنيۆەرسيتەتىنىڭ سەيسمولوگ- عالىمدارى.

ولار مۇنداي تۇجىرىمعا گيمالاي ايماقتارىن زەرتتەپ بايقاعان سوڭ كەلىپ وتىر، دەپ حابارلايدى Newsland.

عالىمداردىڭ پىكىرىنشە، سول ماڭدا ۇندىلىك جەر قاتپارى ازيالىق جەر قاتپارىمەن سوقتىعىسىپ، تاعى دا قۋاتتى جەر سىلكىنىستەرىن تۋدىرۋى مۇمكىن.

ايتا كەتەيىك، ورىن العان تابيعي اپاتتىڭ بولاتىنىن ماماندار 2001-جىلى-اق بولجاعان، ءبىراق ونىڭ ناقتى قاي ۋاقىتتا باستالاتىنىن ەشكىم ءدوپ باسىپ ايتا المادى.

ەستەرىڭىزگە سالا كەتەيىك، نەپالدا تەربەلىسى 7,9 باللعا جەتكەن جويقىن ءزىلزالا 25- ءساۋىر كۇنى تاڭەرتەڭ بولدى.

ونىڭ كىندىگى ەل استاناسى كاتماندۋدان سولتۇستىك-باتىسقا قاراي 82 شاقىرىم جەردە، 15 شاقىرىم تەرەڭدىكتە بولدى. بۇدان كەيىن كۇندىز نەپالدا بىرنەشە جەراستى ءدۇمپۋى بولىپ، ونىڭ ەڭ قۋاتتىسىنىڭ كۇشى 6,7 باللعا جەتتى.

جەر سىلكىنىسىنىڭ قۇرباندارى سانى قازىرگى تاڭدا 7 مىڭ ادامنان استى، 14397 ادام جاراقاتتانعان.