اقتوبەدە تەگىن تال تاراتقان دەپۋتاتتاردىڭ جومارتتىعى ۇلكەن داۋمەن اياقتالدى

استانا. قازاقپارات - اقتوبەدە مەرەكە كۇنى تۇرعىندارعا ەرەكشە تارتۋ جاساماق بولعان ءماسليحات دەپۋتاتتارىنىڭ باسى بالەگە قالدى دەپ حابارلايدى ك ت ك ارناسى.

ولار تەگىن اعاش كوشەتتەرىن تاراتپاق بولعان. مۇنى ەستىگەن اقتوبەلىكتەر تاڭ اتپاي تالداردى تالاپ اكەتىپتى. ال ايتىلعان ۋاقىتتا كەلىپ، قولدارىنا شىبىق تيمەي قالعاندار حالىق قالاۋلارىن ايقايدىڭ استىنا الدى.

ەمحانانىڭ الدىندا تاڭنان بەرى حالىق شۋلاپ ءجۇردى. سەبەبى مەكەمەنىڭ قوجايىنى، ءماسليحات دەپۋتاتى ەسكەندىر سەرىكباي ۇلى ارىپتەستەرىمەن بىرلەسە اقشا جيناپتى. ول قاراجاتقا تال-تەرەك ساتىپ الىپ، تۇرعىندارعا تەگىن تارتپاق بولعان. ءبىراق ايتۋلى ۋاقىتتان ەرتە كەلگەندەر تەگىن اعاش كوشەتتەرىن تالاپ الىپتى. ال تال-شىبىقتار قولدارىنا تيمەي قالعاندار حالىق قالاۋلىلارىنا اشۋلى.

«كوزبوياۋشىلىق بارىپ تۇرعان. باسە دەپۋتاتتار اياق-استى نەگە جومارت بولىپ قالدى دەپ ويلاسام. دۇرىس ۇيىمداستىرىلماعان. قالاي بولسا سولاي تاراتقان. 10 دا كەلىڭدەر دەگەن. 9 دا كەلسە تۇكتە قالماعان»، - دەيدى تۇرعىن.

اشۋعا بۋلىققان جۇرت ەمحاناعا باسىپ كىردى. ولاردىڭ اپتىعىن باسۋ ءۇشىن ءتىپتى دارىگەرلەر ءوز قولدارىنداعى ساناۋلى اعاش كوشەتتەرىن بەرگەن.

جەرگىلىكتى حالىق قالاۋلىلارىنىڭ وزدەرى تۇرعىندارعا وسىلاي تارتۋ جاساعاندارىنا وكىنىپ جۇرگەن سياقتى. ارىپتەستەرىنىڭ اتىنان كەلگەن جالعىز دەپۋتات جينالعاندارعا بارىنشا باسۋ ايتىپ الەك.

«ءبىز اعاش كوشەتتەرىن ءوز اقشامىزعا ساتىپ الدىق. ەرتە كەلگەندەر الىپ كەتكەن ءبارىن. سەبەبى بۇل جەردە كۇزەت بولمادى. ەندى جەتپەي قالعاندارىنا تاعى دا اكەلىپ بەرەمىز»، -  دەدى اقتوبە قالالىق ءماسليحاتىنىڭ دەپۋتاتى ءانۋار تاسىموۆ.

العاشقىدا دەپۋتاتتار اعاش كوشەتتەرىن تەگىن العاندارعا بىرنەشە تالاپ قويامىز دەپ جوسپارلاعان ەكەن. ول ءۇشىن جەكە كۋالىكتەرىمەن تىركەلىپ، وتىرعىزعان تال-تەرەگىنىڭ قاسىندا سۋرەتكە ءتۇسۋى كەرەك بولعان. ەندى تارتۋ جاسايمىن دەپ تۇرعىنداردى تالاستىرىپ قويعانداردىڭ بۇل ويى ىسكە اسپايتىنى انىق.