مىقتى كوشباسشى قازاقستاننىڭ ەكونوميكالىق دامۋىن الدىن الا انىقتايدى - ازەربايجاندىق پارلامەنتشىلەر

باكۋ. قازاقپارات - نۇرسۇلتان نازاربايەۆتىڭ جەڭىسى قازاقستان باسشىسىنىڭ حالىق اراسىنداعى بەدەلى مەن وعان دەگەن سەنىم دەڭگەيىنىڭ جوعارى ەكەنىن دالەلدەدى.

بۇل تۋرالى ازەربايجان ميللي مەدجليسىنىڭ (پارلامەنتى) مادەنيەت بويىنشا كوميتەتىنىڭ ءتوراعاسى، دەپۋتات نيزامي دجافاروۆ ايتتى.

«قازاقستان ءبىز ءۇشىن جاقىن ەل دەپ اتاپ وتكىم كەلەدى. ال نۇرسۇلتان نازاربايەۆتى ازەربايجاندا دا قۇرمەتتەيدى. ول شىنىمەن ۇلتتىڭ ناعىز ليدەرى. ول بۇكىل تۇرىك الەمىنىڭ ليدەرى. مۇنى ءبىزدىڭ مەملەكەتتەرىمىزدىڭ باسشىلارى مەن حالقى دا مويىندايدى»، - دەدى ن. دجافاروۆ.

«ءبىزدىڭ ۇلتتىق ليدەرىمىز گەيدار اليەۆ نۇرسۇلتان ءابىش ۇلىمەن دوستىق قارىم-قاتىناستا بولعان، ال پرەزيدەنت يلحام اليەۆ قازاقستان باسشىسىن قۇرمەتتەپ، ەكى ەل اراسىنداعى ساياسي بايلانىستى نىعايتۋ جولىندا جۇمىس جاساپ جاتىر. قازاقستان حالقى دۇرىس تاڭداۋ جاسادى. ەلدىڭ دامۋى نۇرسۇلتان نازاربايەۆپەن بايلانىستى»، - دەپ اتاپ ءوتتى ازەربايجاندىق پارلامەنتشى.

سونىمەن قاتار دەپۋتات ن. دجافاروۆ تۇرىك ەلدەرى قازاقستان مەن ونىڭ باسشىسىنان كوپ نارسەنى ۇيرەنەتىنىن ايتتى.

«سوعىس، ۇلتارالىق قاقتىعىس، ەكونوميكالىق داعدارىس بولىپ جاتقان ەلدەرگە قاراڭىزدار. بۇل مىقتى ليدەردىڭ بولماۋىنىڭ سالدارى. قازاقستاندا مۇنداي ليدەر بار. سوندىقتان ول ەلدىڭ ەكونوميكالىق دامۋ جولىن الدىن الا انىقتاپ، ەل ازاماتتارىنىڭ جاعدايىن جاقسارتىپ جاتىر»، - دەپ ءتۇيدى ن. دجافاروۆ.