جامبىلدىڭ لەنينگرادتىق ورەندەرگە ارناعان تولعاۋى بەيجىڭدەگى «جەڭىس جاڭعىرىعى» مەرەكەلىك كەشىندە وقىلدى - فوتو
«كونسەرتتى قازاقستان، رەسەي، وزبەكستان، تۇركىمەنستان جانە قىرعىزستان ستۋدەنتتەرى ءبىر اي بويى ازىرلەدى. وعان بارلىق پوستكەڭەستىك ەلدەر ەلشىلىكتەرىنە شاقىرۋ جىبەرىلدى. ءبىز بۇل كونسەرت ارقىلى 21-عاسىردىڭ ستۋدەنتتەرى سول سوعىس كەزىندەگى ەرلىكتى ەستە ساقتاپ، قۇرمەتتەيتىنىمىزدى كورسەتپەك بولدىق»، - دەدى قازاقپاراتقا بەرگەن سۇحباتىندا قىتايداعى قازاق ستۋدەنتتەرى قاۋىمداستىعى بەيجىڭ بولىمشەسىنىڭ ءتوراعاسى ءاشىم تۇرىسكەلدين.
شاراعا «ۇلى وتان سوعىسىنداعى جەڭىسكە 70 جىل» مەدالىمەن ماراپاتتالعان قىتايلىق ارداگەرلەر، جاپونياعا قارسى سوعىستاعى قىتايلىق قولباسشىلاردىڭ ۇرپاقتارى قۇرمەتتى قوناق رەتىندە قاتىستى.
كونسەرت سەناريى سوعىستىڭ بۇكىل حرونيكاسىن كورسەتتى: ديكتور ليەۆيتاننىڭ فاشيستىك گەرمانيانىڭ تۇتقيىلدان شابۋىل جاساعانى جونىندەگى شۇعىل حابارىنان باستاپ، سوعىس جىلدارى اندەرى ارقىلى ۇلى جەڭىسكە دەيىنگى وقيعالار كورسەتىلدى. ۇلى وتان سوعىسى كەزىندەگى اسكەري كيىم كيگەن ستۋدەنتتەر سوعىس جىلدارىنىڭ اندەرىن، ولەڭدەرىن جانە بيلەرىن ورىندادى.
قازاقستاندىق ستۋدەنتتەر قازاق جانە ورىس تىلدەرىندە جامبىل جابايەۆتىڭ «لەنينگرادتىق ورەندەرىم» ولەڭىن وقىپ، جەڭىسكە قازاقستاننىڭ قوسقان ۇلەسى، سونىڭ ىشىندە قازاق حالقىنىڭ ەرجۇرەك باتىرلارى مەن تىل ەڭبەككەرلەرى تۋرالى ايتىپ بەردى.
«قازاقستاندىق ستۋدەنتتەر بۇل شاراعا باستاماشى بولدى. قازاقستان ۇلى وتان سوعىسىنداعى جەڭىسكە زور ۇلەس قوستى. بۇل - ءبىزدىڭ جاۋىنگەرلەرىمىزدىڭ وشپەس ەرلىگى، تىلداعى جانقيارلىق ەڭبەك. سوعىس مايداندارىندا اتىلعان ون وقتىڭ توعىزى قازاقستاندا جاسالعان»، - دەدى قازاقستاندىق جۋرناليستەرگە سۇحباتىندا كونسەرتكە قاتىسۋشى، قىتاي عىلىمي-تەحنيكالىق ۋنيۆەرسيتەتىنىڭ 2-كۋرس ستۋدەنتى ازامات كارمانوۆ.
ستۋدەنتتەر «جەڭىس كۇنى»، «ەندى سوعىس بولماسىن» اندەرىمەن ءوز ونەرلەرىن اياقتادى، بۇدان ءارى كونسەرت ەستافەتاسىن قىتايلىق تاراپ جالعاستىردى. كونسەرتتەن كەيىن فۋرشەتتە ارداگەرلەر مەن قوناقتار دالالىق اسكەري داستارحاننان سولدات بوتقاسىنان ءدام تاتتى، ونى قازاقستاندىق جانە رەسەيلىك ستۋدەنتتەر جانە گرۋزين اسپازدارى ازىرلەدى.
بەيجىڭدەگى رەسەي مادەني ورتالىعىنىڭ وكىلى ۆلاديمير ماركين ت م د ەلدەرىنىڭ جاستارى سوعىس باتىرلارى مەن ۇلى جەڭىس تۋرالى ەستەلىكتەردى ماڭگى جادىندا ساقتايتىنىن اتاپ ءوتتى، ونىڭ ايتۋىنشا، بۇگىندە بارلىعىنا بەيبىتشىلىك پەن كەلىسىم جاعدايىندا ءومىر سۇرۋگە مۇمكىندىك بەرگەنى ءۇشىن قازىرگى ۇرپاق مايدانگەرلەرگە ماڭگى قارىزدار.
