قازاقستاندىق شەكاراشىلار قىرعىز ارىپتەستەرىنە جەڭىس ەستافەتاسىنىڭ سيمۆولىن تاپسىردى - فوتو

بىشكەك. قازاقپارات - كەشە مەملەكەتتىك شەكارانىڭ قىرعىز-قازاقستاندىق ۋچاسكەسىنىڭ «اقتىلەك-قاراسۋ» باقىلاۋ-وتكىزۋ بەكەتىندە قازاقستاندىق شەكاراشىلار قىرعىز ارىپتەستەرىنە جەڭىس ەستافەتاسىنىڭ سيمۆولىن سالتاناتتى جاعدايدا تاپسىردى.

شارا قازاقستان مەن قىرعىزستاننىڭ مەملەكەتتىك ءانۇراندارى ورىندالۋىمەن باستالدى. ق ر ۇ ق ك شەكارا قىزمەتىنىڭ «وڭتۇستىك» وڭىرلىك باسقارماسى باستىعىنىڭ ورىنباسارى، پولكوۆنيك ءابۋساحيت تولەگەنوۆ پەن قىرعىز رەسپۋبليكاسى مەملەكەتتىك شەكارا قىزمەتىنىڭ تاربيە جۇمىستارى جونىندەگى باسقارما باستىعى، پولكوۆنيك انارباي كەلدىبايەۆ جەڭىس ەستافەتاسى سيمۆولىن بەرۋ تۋرالى حاتتاماعا قول قويدى.

قورداي اۋدانىنڭ اكىمى قۋات يماناليەۆ ارداگەرلەر مەن قوناقتار الدىندا قۇتتىقتاۋ ءسوز سويلەدى. سونداي-اق ۇلى وتان سوعىسىنىڭ ارداگەرى يۆان يرحين، قىرعىز رەسپۋبليكالىق ارداگەرلەر كەڭەسىنىڭ ءتوراعاسى تاراس توقومبايەۆ، ق ر مەملەكەتتىك شەكارا قىزمەتى ارداگەرلەر كەڭەسىنىڭ ءتوراعاسى ستالبەك اساكەيەۆ جانە اۋعان سوعىسىنىڭ ارداگەرى پەتر ۋزلوۆتار قۇتتىقتاۋ لەبىزدەرىن جەتكىزدى.

قازاقستاندىق جانە قىرعىزستاندىق شەكاراشىلار سوعىس جىلدارىنىڭ اندەرىن ورىنداپ، كورەرمەندەرگە قۋانىش سىيلادى.

اسكەري-پاتريوتتىق جەڭىس ەستافەتاسى 2015-جىلعى 2- اقپاندا ەكى قالادان - برەستىدەن (بەلارۋس رەسپۋبليكاسى) جانە مۋرمانسكىدەن (رەسەي فەدەراتسياسى) باستالعان بولاتىن. ەستافەتا تاۋەلسىز مەملەكەتتەر دوستاستىعىنىڭ سىرتقى شەكارالارى بويىمەن وتۋدە، ول ۇلى وتان سوعىسىنداعى جەڭىستىڭ 70 جىلدىعىنا ارنالعان.

قىرعىز اۋماعى ارقىلى جەڭىس ەستافەتاسى 2-7- مامىر كۇندەرى قاراقول، نارىن، بالىقشى، بىشكەك جانە وش وبلىسىنىڭ الاي اۋدانىنداعى گۇلشا اۋىلى ارقىلى وتەدى. وسى قالالار مەن ەلدى مەكەندەردە سالتاناتتى شارالار، تاقىرىپتىق كەشتەر، كورمەلەر، كاسىبي ارتىستەر مەن كوركەمونەرپازدار ۇجىمدارىنىڭ كونسەرتتەرى بولادى.

7- مامىردا قىرعىز شەكاراشىلارى ەستافەتانى وزدەرىنىڭ تاجىك ارىپتەستەرىنە تاپسىرادى. بۇدان ءارى ەستافەتا وزبەكستان، تۇركىمەنستان، ازەربايجان اۋماقتارى ارقىلى ءوتىپ، 28- مامىردا ماسكەۋ قالاسىنداعى تاعزىم تاۋىندا مارەگە جەتەدى.