اتىراۋدا باتىس قازاقستاندىق اقىن ب. حاليوللانىڭ شىعارماشىلىق كەشى ءوتتى

ورال. قازاقپارات - اتىراۋ قالاسىنداعى ماحامبەت اتىنداعى وبلىستىق قازاق دراما تەاترىندا باتىس قازاقستاندىق اقىن، قازاقستان جازۋشىلار وداعىنىڭ مۇشەسى باۋىرجان حاليوللانىڭ «جۇلدىز جاۋعان جارىق ءتۇن» اتتى جىر جيناعىنىڭ تۇساۋكەسەرى مەن شىعارماشىلىق كەشى ءوتتى.

اقىن، «دارىن» مەملەكەتتىك جاستار سىيلىعىنىڭ لاۋرەاتى جاناربەك ءاشىمجان جۇرگىزگەن كەشتە وسى شارانىڭ وتۋىنە مۇرىندىق بولعان اتىراۋ وبلىسىنىڭ اكىمى باقتىقوجا ىزمۇحامبەتوۆ، سونداي-اق ب. حاليوللانىڭ ۇستازى، بەلگىلى اقىن ءجۇرسىن ەرمان جازبا اقىندىقپەن بىرگە ايتىس كوگىندە دە جارقىراي بىلگەن باۋىرجانعا جىلى لەبىزدەرىن ءبىلدىرىپ، وعان ارناعان ءوز ولەڭدەرىن وقىپ بەردى.

ادەبي كەشكە باتىس قازاقستان وبلىسىنان دا ارنايى دەلەگاتسيا قاتىستى. ولاردىڭ اتىنان اقىندار، قازاقستان جازۋشىلار وداعى ب ق و بولىمشەسىنىڭ ءتورايىمى اقۇشتاپ باقتىگەرەيەۆا، عايساعالي سەيتاق، وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆ ءسوز الىپ، ەلدىڭ تىلەگىن جەتكىزدى. باتىس قازاقستاندىق انشىلەر داستان ەسەنتەمىروۆ، ارمات ەسلامعاليەۆ، ەرنار ءومىرالى، ميراس باقتىعۇلوۆ باۋىرجاننىڭ تۋىندىلارىن ورىندادى.

كەش بارىسىندا باۋىرجان حاليوللا ءوز ولەڭدەرىن وقىپ، اتىراۋ جۇرتشىلىعىنىڭ قوشەمەتىنە بولەندى.

ايتا كەتەيىك، كوپتەن بەرى ايتىستان كورىنبەي كەتكەن باۋىرجان اتىراۋ قالاسىنداعى اتالمىش تەاتردا «نۇر وتان» پارتياسىنىڭ ۇيىمداستىرۋىمەن ءوتىپ جاتقان «ۇرپاققا ۇران بولعان ۇلى جەڭىس» اتتى رەسپۋبليكالىق اقىندار ايتىسىنا قاتىسۋدا. ول 2- مامىر كۇنى تۇركىستاندىق بەكارىس شويبەكوۆپەن ايتىسىپ، ەكەۋى دە قازىلار القاسىنىڭ جوعارى باعاسىن الدى. 3- مامىر كۇنى ايتىستىڭ فينالدىق سايىستارى وتەدى.

اۆتور: ەلجان ەرالى