ۇلى وتان سوعىسىنىڭ باتىرلارى: قايىرعالي سماعۇلوۆ
ول كەڭەس اسكەرى قاتارىنا 1939-جىلى شاقىرىلعان. 1941-جىلدىڭ ماۋسىمىنان سولتۇستىك كاۆكاز مايدانى 18-ارميا 318-اتقىشتار ديۆيزياسى 1339-اتقىشتار پولكى قۇرامىندا ۇلى وتان سوعىسىنا قاتىسقان.
ونىڭ ايرىقشا قايسارلىعى، اسىرەسە، كەرچ تۇبەگىندەگى ۇرىستا بايقالدى. دەسانتشى جاۋىنگەرلەردەن قۇرىلعان 20 سارباز 44 كۇن بويى جاۋ قىسپاعىنا توتەپ بەرگەن. سماعۇلوۆ جەكە ءوزى ەلتيگەن (ۋكراينا، قىرىم تۇبەگى، ەلتيگەن) قىستاعى ءۇشىن بولعان ۇرىستا جاۋدىڭ 20 عا جۋىق اسكەرىن جويعان. سماعۇلوۆقا باتىلدىعى ءۇشىن ك س ر و جوعارعى كەڭەسى ءتورالقاسىنىڭ جارلىعىمەن كەڭەس وداعىنىڭ باتىرى اتاعى بەرىلدى (17.11.1943). 1946-جىلى زاپاسقا شىقتى.
1950-جىلى الماتىداعى پارتيا مەكتەبى جانىنداعى كۋرستى بىتىرگەن. 1955-جىلى 12№ كاسىپتىك-تەحنيكالىق ۋچيليشەسىنىڭ ديرەكتورى قىزمەتىن اتقارعان. باتىردىڭ ءومىرى مەن ەرلىگى ع. مۇسىرەپوۆتىڭ «قازاق سولداتى» شىعارماسىنا ارقاۋ بولعان.
سوعىستان كەيىنگى جىلدارى ايماقتىڭ الەۋمەتتىك قامسىزداندىرۋ جۇمىستارىنا باسشىلىق جاسادى. 1963-1973-جىلدار ارالىعىندا اتىراۋ ۋنيۆەرسيتەتىندە ازاماتتىق قورعانىس كافەدراسىندا ەڭبەك ەتتى.
تەڭدىك اتىنداعى (اتىراۋ قالالىق اكىمدىگى اۋماعىندا) ورتا مەكتەپكە سماعۇلوۆتىڭ ەسىمى بەرىلگەن. لەنين، l-دارەجەلى وتان سوعىسى وردەندەرىمەن، بىرنەشە مەدالدارمەن ماراپاتتالعان.
