اتا-انامىز قازاقستان جەرىنە العىس ايتىڭدار دەپ امانات قالدىرىپ كەتتى - ليۋدميلا تيان

استانا. قازاقپارات - استاناداعى كورەيانىڭ مادەنيەت ورتالىعىنىڭ وكىلى، ەلوردالىق تۇرعىن ليۋدميلا تيان بۇگىن بارلىق وتانداستارىن قازاقستان حالقىنىڭ بىرلىگى كۇنىمەن قۇتتىقتادى.

«ءبىز قازاقستان پرەزيدەنتى نۇرسۇلتان نازاربايەۆتى قايتا سايلاعانىمىزعا قاتتى ريزامىن. سەبەبى مۇنداي حالىقتىق مەرەكەنىڭ تويلانۋى - سول كىسىنىڭ ارقاسى. بۇل كوكتەمنىڭ بەيبىتشىلىك پەن تاتۋلىققا ۇندەيتىن ادەمى مەرەكەسى. وسىناۋ اتاۋلى كۇنمەن بارشا قازاقستاندىقتاردى قۇتتىقتاعىم كەلەدى. اشىق اسپان، ءال- اۋقات تىلەيمىن!» - دەپ اتاپ ءوتتى ول «قازاقپارات» تىلشىسىنە بەرگەن سۇحباتىندا.

ليۋدميلا تياننىڭ ايتۋىنشا، ونىڭ اتا- اناسى «ستاليندىك كەزەڭدە» قيىر شىعىستان جەر اۋدارىلعان جانە تەك قازاق حالقىنىڭ مەيىرباندىعىنىڭ، قوناقجايلىلىعىنىڭ ارقاسىندا امان قالدى.

«قيىر شىعىستان قازاقستانعا ساپار كەزىندە كارىلەر مەن بالالار شىداماي كوز جۇمدى. تەك جاستار عانا ءتىرى قالعان. مەنىڭ اتا- انام «باسقا ەمەس، ءدال وسى قازاقستان جەرىندە قالعانىمىز ءۇشىن قۇدايعا العىس ايتىپ وتىرىڭدار» دەپ ولە-ولگەنشە ايتىپ كەتتى. قازاقتار جالعىز ءتۇيىر نانىمەن ءبولىستى، سۋ ىشكىزدى، باسىمىزعا پانا بەردى. ءبىز وسىندا ءتىرى قالدىق. ءبىزدىڭ اتا-انالارىمىز سول كەزەڭدى كوز جاسىمەن ءاردايىم ەسكە الىپ وتىردى. ەندى مىنە، بالالار ءوستى، نەمەرەلەر پايدا بولدى. وسى جەردى قاسيەت تۇتامىز، سىيلايمىز»، - دەدى ليۋدميلا تيان.

اۆتور: جاسۇلان جولدىبايەۆ