الماتى - تۋريستەردىڭ قالتاسىن قاعاتىن قالا ما؟
الماتى قالاسىندا شەتەلدىك تۋريستەر قوناق ءۇيدىڭ ءبىر كۇنىنە 60 مىڭ تەڭگەگە دەيىن اقشا شىعىندايدى، - دەپ اقپارات تاراتادى iskernews.
الايدا، قالالىق تۋريزمدى باسقارۋ ءبولىمى بۇل قۇبىلىستى شەتەلدىك قوناقتاردىڭ ءوز قالاۋى دەگەن ويدا.
الماتى قالاسى تۋريزمدى باسقارۋ ءبولىمىنىڭ باسشىسى جانار الشىمبايەۆا: «بۇكىل الەمدىك داعدارىس دەمالىستىڭ باعاسىنا دا ءوز اسەرىن تيگىزىپ جاتىر. جۋىردا ءبىز لوندوندىق ارىپتەستەرىمىزبەن نەلىكتەن قازاقستاننىڭ قىمبات دەمالىس ورنى بولىپ سانالاتىندىعى جونىندە كەڭەستىك. ءبىزدىڭ ەلىمىزگە تۋريستىك ساياحاتپەن كەلەتىندەردىڭ ءبىر بولىگى جاقسى قوناق ءۇي، جاقسى دەمالىس ءۇشىن اۋقىمدى اقشا تولەۋگە دايىن»، - دەيدى.
ونىڭ ايتۋىنشا، الماتىدا ءاربىر تۋريست ءۇشىن ىڭعايلى قوناق ۇيلەر جوق ەمەس. قالانىڭ تۋريستىك پوتەنسيالى دا وتە جوعارى. كەز-كەلگەن ادام ءوزىنىڭ قالتاسىنا قاراي قوناتىن ورىن تابا الاتىن كورىنەدى.
ستاتيستيكالىق مالىمەتتەرگە سۇيەنسەك، مەگاپوليستە 122 قوناق ءۇي جۇمىس ىستەيدى. ونىڭ ىشىندە بەسجۇلدىزدى (5)، ءتورتجۇلدىزدى (42) جانە 80 گە تارتا باسقا دا قوناقۇيلەر بار. مۇنىمەن قوسا، قالادا حوستەل(جاتاقحانا) سياقتى ۇنەمدى تۇرعىن ۇيلەر كەشەندەرى دە تۋريستەرگە قىزمەت كورسەتۋگە نيەتتى.
مۇندا ءبىر تاۋلىكتىك كەرەۋەت باعاسى ەكى مىڭ تەڭگەدەن باستالادى. ءبولىم باسشىسى EXPO جانە ۋنيۆەرسيادا-2017 سياقتى كەڭ اۋقىمدى ءىس- شارالاردان الدىن ارنايى ماماندار، الماتى قالاسىنىڭ تۋريستىك پوتەنتسيالىن ساراپتامادان وتكىزگەنىن ايتىپ ءوتتى. بۇل زەرتتەۋلەردىڭ قورىتىندىسى بويىنشا، الماتىداعى قوناقۇيلەردىڭ بىرمەزگىلدەگى سىيىمدىلىعى 12 مىڭ ورىنعا دەيىن قامتي الادى.
ەركەجان جۇماتايەۆا
turkystan.kz
