مايدانگەر ءازىلحان نۇرشايىقوۆتىڭ ءسابيت مۇقانوۆقا جازعان حاتى

استانا. قازاقپارات - «ءسابيت اعا! سىزگە قازاق جىگىتتەرى دۇعاي- دۇعاي سالەم جولدايدى.

ءبىز قازىر جات ولكەدە جاۋ جەرىندەمىز. دۇشپاندى ءوز ىنىنە اكەپ تىقتىق. قازىر ونى ءىن ىشىندە جويۋ، ءبىرجولا قۇرتۋ، قيراتۋ ءۇشىن بەرلين قاقپاسىنىڭ اۋزىن قانداتىپ، قالاسىنىڭ الدىن شاڭداتىپ، نايزامىزدى كوكىرەگىنە تىرەپ تۇرمىز.

كەشە تۋحەل دەگەن قالانى الدىق. سول ءۇشىن موسكۆا بىزگە ءتورتىنشى رەت ساليۋت بەردى. بۇل وتاننان از ۋاقىتتىڭ ىشىندە ءتورتىنشى رەت العان العىسىمىز. ديۆيزيامىزدىڭ داڭقى ارتىپ، تۋى جەڭىس شۇعىلاسىنا بولەنۋدە. (بۋگ - ناريەۆتاعى بەكىنىسىنەن جاۋدى قۋىپ شىققانىمىز ءۇشىن، ءتورۋندى العانىمىز ءۇشىن، تۋحەلدى العانىمىز ءۇشىن - وسى ءتورت كەزەڭدەگى جاۋىنگەرلىك زور تابىستارىمىز ءۇشىن ديۆيزيا جوعارى باس كوماندوۆانيەدەن ءتورت العىس الدى) .

ءوزىڭىز كورگەن مۋسين قابىش جارالانىپ كەتتى. وقيعا بىلاي: بارلاۋشىلار ۆزۆودىنىڭ كومانديرى لەيتەنانت جاڭابەرگەن الىمبايەۆ 10 اداممەن بارلاۋعا شىعىپ، 400-دەن ارتىق فاشيستىڭ قورشاۋىندا قالادى. ونىڭ ىشىندە مۋسين دە بار. بۇلار جاۋمەن ەكى ساعات سوعىسىپ، ولاردى وزدەرىنە جاقىنداتپايدى. بارلاۋشىلاردىڭ وقتارى بىتۋگە اينالادى. ابدەن ساسادى. بۇلار جۇزدەن ارتىق فاشيستى ولتىرەدى. نە دە بولسا بەرىلمەسكە بەل بايلايدى. مۋسين مەن الىمبايەۆتىڭ قولدارىندا تانك قيراتاتىن نە بارى ەكى عانا گراناتا بولادى. ولاردىڭ وق ءدارىسىنىڭ بىتكەنىن سەزگەن دۇشپان العا جۇگىرەدى. الىمبايەۆ پەن مۋسين جاۋدىڭ ەڭ قالىڭ جەرىنە قولدارىنداعى گراناتالارىن لاقتىرىپ، جاعدايدى پايدالانىپ كەيىن شەگىنەدى. كوپكە توپىراق شاشسىن با، ال جاۋ بۇلاردىڭ بەسەۋىن اتىپ جىعادى. التىنشى بولىپ مۋسين قۇلايدى. ونىڭ سول جاق يىعىنان وق تەسىپ وتەدى.

 مايشينوۆ تە بارلاۋشى بولاتىن. وسى تۋحەل قالاسىن العاننان كەيىن، سونىڭ تەرىستىك باتىسىندا شامامەن ءتورت كيلومەتر جەردە اراق زاۆودىنا بارلاۋشىلار شابۋىل جاسادى. كىشكەنتاي شابۋىلدان كەيىن بارلاۋشىلار اتاكاعا كوتەرىلەدى. مايشينوۆ، لەونوۆ، سولوۆيەۆ دەگەن بارلاۋشىلار جاۋدىڭ جاتقان جەرىنە الدىمەن بارىپ كەلەدى. مايشينوۆ پۇشپاقتا جاۋدىڭ تىعىلىپ تۇرعان تانكىسىنە تۋرا قارسى كەپ قالادى. مايشينوۆ شەگىنبەستەن وڭ قولىمەن بەلىندەگى تانك قيراتاتىن گراناتانى ۇستاپ، تۇپ- تۋرا تانككە قارسى جۇرەدى. تانك پۋلەمەتتەن وق اتىپ، ءبىزدىڭ جاياۋ اسكەرگە قاتەر توندىرەدى. تانكتىڭ استىنا تۇسسەم دە، ونى جويايىن دەپ ۇيعارادى مايشينوۆ. ءبىراق ول تانككە جەتپەي قۇلاپ تۇسەدى. ول بەلىندەگى گراناتقا جارماسقاندا پۋلەمەتتەن اتىلعان وق ونىڭ گراناتتى قاپسىرا ۇستاعان قولىنا تيەدى. گراناتتىڭ سابى بىت- شىتى شىعىپ ۇشىپ كەتەدى، وڭ جاق كەۋدەسىنەن ەكى وق قاتار ءتيىپ، تەسىپ وتەدى. يەگى جارالانادى.

سول كۇنى وت باسىندا، كەشقۇرىم، زەڭبىرەگىمنىڭ جانىندا كۇندەلىكتى داپتەرىمە بىرنارسەلەر جازىپ جاتىر ەدىم، بىرەۋ «ءازىلحان بار ما؟ » - دەپ ايقاي سالدى. كىمنىڭ داۋىسى ەكەنىن ايىرا الماي، «بارمىن» دەدىم. قاراسام تاكەڭ ەكەن. جاعىن تاڭىپ الىپتى. جارالى ەكەنىن ءبىلدىم. سول قولىن بەرىپ امانداستى. وڭ قولى جارالى ەكەنىن تاعى ءبىلدىم. بال قوسىپ قانتپەن شاي ىشكىزدىم. جاۋ جەرىنە كەلگەلى بال، قانت سياقتىلار ءبىزدىڭ قولدا. دۇنيە- مۇلىك شاشىلىپ جاتادى. وعان ەشكىم قارامايدى. سودان كەيىن ونى سانباتقا قاراي شىعارىپ سالدىم.

بۇل تۋرالى كوبىرەك جازىپ وتىرعانىم، ول سىزگە سالەم ايتۋدى كوپ ءوتىنىپ ەدى.

اعاجان، حات كۇتەمىن. حوش سالەمەت بولىڭىز.

1945 -جىلعى 18 - فيەۆرال

ءازىلحان نۇرشايىقوۆ

قازاق س س ر ورتالىق مەملەكەتتىك ءارحيۆى،

ف. 1634, وپ. 1, د. 90, 54-بەت. ءتۇپنۇسقاسى.

ماتەريال «سالەم ساعان مايداننان، قازاقستان!» (1975 -جىل، الماتى) دەرەك كوزىنەن الىنىپ بەرىلدى.

ازىرلەگەن - سەرىك ءابىلحان

«الاش ايناسى»