اقمولادا «قازاقستان تاريحىندا يسلامنىڭ رۋحاني بەينەسى» اتتى تاقىرىپتا جازىلعان عىلىمي ماقالالار بايقاۋىنىڭ جەڭىمپازدارى ماراپاتتالدى- فوتو

كوكشەتاۋ. قازاقپارات - اقمولا وبلىسىندا «قازاقستان تاريحىندا يسلامنىڭ رۋحاني بەينەسى» اتتى تاقىرىپتا جازىلعان عىلىمي ماقالالار بايقاۋىنىڭ جەڭىمپازدارى ماراپاتتالدى.

بۇل تۋرالى وبلىستىق ىشكى ساياسات باسقارماسىنىڭ باسپا ءسوز قىزمەتىنەن حابارلادى.

 كوكشەتاۋدا قازاق حاندىعىنىڭ 550 جىلدىعىن تويلاۋ اياسىندا اقمولا وبلىستىق ءدىن ىستەرى باسقارماسى مەن «كونفەسسياارالىق قاتىناستى ساراپتاۋ جانە دامىتۋ ورتالىعى» م م جانە ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى بىرلەسىپ، «قازاقستان تاريحىندا يسلامنىڭ رۋحاني بەينەسى» اتتى تاقىرىپتا عىلىمي- پراكتيكالىق كونفەرەنسيا وتكىزدى.

شاراعا وبلىس اكىمىنىڭ ورىنباسارى نۇرلان نۇركەنوۆ، باشقۇرتستان رەسپۋبليكاسى ۋفا ەكونوميكا جانە سەرۆيس مەملەكەتتىك ۋنيۆەرسيتەتىنىڭ تاريح، پسيحولوگيا جانە پەداگوگيكا كافەدراسىنىڭ دوتسەنتى ي. يگداۆلەتوۆ، استانا جانە الماتى قالالارىنىڭ ءدىن ىستەرى وكىلدەرى قاتىستى.  

 كونفەرەنسيانىڭ ەڭ ماڭىزدى تۇسى، ول «قازاقستان تاريحىندا يسلامنىڭ رۋحاني بەينەسى» اتتى تاقىرىپتا جازىلعان عىلىمي ماقالالار بايقاۋىنىڭ جەڭىمپازدارىن ماراپاتتاۋ بولدى.

 ەسكە سالا كەتسەك، اتالعان بايقاۋ 2015 -جىلدىڭ 26 -قاڭتارىنان 10 -ءساۋىر ارالىعىندا جۇرگىزىلدى. وعان جۋرناليستەر مەن ستۋدەنتتەر، «ءدىن تانۋ» مۇعالىمدەرى مەن وقۋشىلارى جانە يسلام ءدىنى وكىلدەرىنەن 118 ادام قاتىستى. بارلىق جۇمىستارمەن تىڭعىلىقتى تانىسىپ شىققان قازىلار 12 جەڭىمپازدى انىقتاپ، ماراپاتتادى.

شارا سوڭىندا كونفەرەنتسياعا جينالعاندار ش. قۇسايىنوۆ اتىنداعى قازاق مۋزىكالىق- دراما تەاترىنىڭ شىعارماشىلىق ۇجىمىنىڭ ورىنداۋىنداعى ج. ەرعاليەۆتىڭ «جان شىرىلى» تۋىندىسىن تاماشالادى.

 

اۆتور: اسلان وسپانوۆ