شىعىس قازاقستاندا جۇرگىزۋشى بىرنەشە قويدى سوتقا بەردى

استانا. قازاقپارات - شىعىس قازاقستاندا جۇرگىزۋشى بىرنەشە قويدى سوتقا بەردى، - دەپ حابارلايدى YK-avto.kz سوتتىڭ باسپا ءسوز قىزمەتىنە سىلتەمە جاساپ.

پورتالدىڭ مالىمەتىنشە، ش ق و- دا اۆتوكولىكپەن سوقتىعىسقان قويلارعا قاتىستى سوت ءىسى اياقتالدى، №2 زىريان اۋداندىق سوتىنىڭ شەشىمىمەن اۆتوكولىككە كەلگەن شىعىندى مالدىڭ يەسى وتەيتىن بولدى.

وقيعا زىريان - وسكەمەن تاس جولىندا بولىپتى. ەر ادام بىرنەشە قويدى كولىگىمەن قاعىپ كەتكەن. جۇرگىزۋشىنىڭ ايتۋىنشا، ايىر تۇياقتىلار جولعا كۇتپەگەن جەردەن شىعىپ كەتىپ سوعىلعان، سالدارىنان ونىڭ كولىگىنە قاتتى زاقىم كەلىپتى. ال قويلاردىڭ زارداپ شەككەن- شەكپەگەنى - بەلگىسىز. ەر ادام كولىكتىڭ شىعىنىن 170 مىڭ تەڭگەگە باعالاپ، سوت الدىندا بىرنەشە ادامنان جاۋاپ الىندى.

«سوت زالىندا ەكى تاراپ بەيبىت كەلىسىمگە كەلدى. ارىزدانۋشى تالاپ ارىزىن قايتارىپ الدى، ال جاۋاپ بەرۋشىلەر شىعىندى وتەپ بەرۋگە مىندەتتەلدى. سوت شەشىمى زاڭدى كۇشىنە ەنگەن جوق»، - دەلىنگەن جاريالانىمدا.