گەننادي گولوۆكيننىڭ جەكپە- جەگى «قازاقستان» تەلەارناسىنىڭ تىكەلەي ەفيرىندە كورسەتىلەدى

استانا. قازاقپارات - گەنناديي گولوۆكيننىڭ امەريكاندىق كىشى ۆيللي مونرومەن مامىر ايىنىڭ ورتاسىندا وتەتىن جەكپە- جەگىن «قازاقستان» تەلەارناسى تىكەلەي ەفيردەن كورسەتەدى.

 بۇل تۋرالى «قازاقستان» ر ت ر ك باسپا ءسوز قىزمەتىنەن حابارلادى.

17 - مامىر كۇنى تاڭەرتەڭ «قازاقستان» تەلەارناسى 2015 - جىلعى باستى كۇرەستەردىڭ ءبىرى - ورتا سالماقتاعى WBA جانە IBO نۇسقالارى بويىنشا الەم چەمپيونى قازاقستاندىق گ. گولوۆكين مەن ورتا سالماقتا «Boxcino-2014» تۋرنيرىنىڭ جەڭىمپازى 28 جاسار كىشى ۆ. مونرومەن كۇرەسىن لوس- اندجەلەس قالاسىنان تىكەلەي ەفيردە كورسەتەدى.

«17 مىڭ ادام سياتىن لوس- اندجەلەستىڭ (ا ق ش) جاڭارتىلعان «The Forum»  ارەناسىنان ۇلكەن بوكس كەشى 17 - مامىر كۇنى ساعات 7.00-دە «قازاقستان» تەلەارناسىنان كورسەتىلەدى. گولوۆكين مەن كىشى مونرونىڭ كۇرەسى شامامەن تاڭعى 9.00 دە كورسەتىلەدى. ترانسلياتسيالار 17 - مامىر كۇنى كۇندىزگى ۋاقىتتا جانە 18 - مامىر كۇنى كەشكى ۋاقىتتا «Кazsport»  تەلەارناسىنان قايتالانادى»، دەلىنگەن حابارلامادا.

گ. گولوۆكين قاراعاندى قالاسىنىڭ تۋماسى، قازاقستاندىق بوكسشى، 2003 - جىلى اۋەسقوي بوكسشىلار اراسىندا الەم چەمپيونى جانە 2004 - جىلى وليمپيادا ويىندارىنىڭ ۆيتسە- چەمپيونى. قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، قازاقستاننىڭ 7 دۇركىن چەمپيونى، حالىقارالىق تۋرنيرلەردىڭ جەڭىمپازى.

2013 - جىلى 24 - ساۋىردە قازاقستاندا حالقى اسسامبلەياسىنىڭ ⅩⅩ سەسسياسىندا گ. گولوۆكين ءوزىنىڭ شىعۋ تەگى تۋرالى بىلاي دەگەن بولاتىن: «ۇلتىم تۋرالى سۇراعان كەزدە، مەن بىلاي دەپ جاۋاپ بەرەمىن: اكەم - ورىس، شەشەم - كارىس، ال مەن - قازاقپىن! مەنىڭ بارلىق جەڭىسىم ەلىمە ارنالادى، مەنىڭ حالقىما، پرەزيدەنتىمە ارنالادى!».