نەپالدىقتار گۋمانيتارلىق كومەك الىپ بارا جاتقان جۇك كولىكتەرىنىڭ جولىن بوگەدى

استانا. قازاقپارات - كاتماندۋدان ءۇش ساعاتتىق جولدا ورنالاسقان اۋىل تۇرعىندارى جەر سىلكىنىسىنەن زارداپ شەككەندەر ءۇشىن گۋمانيتارلىق كومەك الىپ بارا جاتقان جۇك كولىكتەردىڭ جولىن بوگەپ تاستادى.

بۇل تۋرالى reuters.com حابارلادى. «ۇكىمەت بىزگە تاماق بەرمەي جاتىر. كۇرىش تيەلگەن جۇك كولىكتەرى جانىمىزدان وتۋدە. بارلىعىن ورتالىق اۋداندارعا عانا تاسىپ جاتىر»، - دەدى نارازىلىق بىلدىرۋشىلەردىڭ ءبىرى ۋدحاۆ گيري. 29- ءساۋىر كۇنى كاتماندۋدا 200 ادام پارلامەنت عيماراتىنىڭ ماڭىنا جينالىپ، ۇكىمەتتەن ءزىلزالادان زارداپ شەككەندەرگە كومەك كورسەتۋىن تالاپ ەتتى.

بىرىككەن ۇلتتار ۇيىمىنىڭ اقپارى بويىنشا، اپات ايماعىندا ازىق-تۇلىك پەن اۋىز سۋدىڭ تاپشىلىعى بايقالادى، ونداعان مىڭ ادام باسپاناسىز قالعان. 25- ساۋىردە ورىن العان جويقىن جەر سىلكىنىسىنەن قازا بولعاندار سانى 5 مىڭنان استى. الايدا، نەپال پرەمەر-ءمينيسترى سۋشيل كويرالا اپات قۇرباندارىنىڭ قورىتىندى سانى 10 مىڭعا جۋىقتاپ قالۋ مۇمكىندىگىن جوققا شىعارمادى.

ءزىلزالا ايماعىندا قيراندىلاردى جيناستىرۋ جۇمىستارى جالعاسۋدا. نەپالعا اپات سالدارىن جويۋعا جاپونيا مەن رەسەي كومەكتەسىپ جاتىر. سونداي-اق ا ق ش، يزرايل، فرانسيا،  ۇلبريتانيا، شۆەيتساريا، پولشا مەن بىرىككەن اراب امىرلىكتەرى دە وزدەرىنىڭ كومەككە دايىن ەكەندەرىن جەتكىزدى، دەپ حابارلايدى egemen.kz.