قازاقستاندا جەر داۋى سوتتىڭ كومەگىنسىز شەشىلەتىن بولدى

استانا. قازاقپارات - قازاقستاندا جەر داۋى سوتتىڭ كومەگىنسىز شەشىلەتىن بولدى، - دەپ حابارلايدى «كرىشا» پورتالى.

ق ر جەر كودەكسىنىڭ قوسىمشاسىنا سايكەس، ەندى جەكە جەر تەلىمدەرىنە قاتىستى داۋ مەن جانجالداردى سوت تارتىبىمەن ەمەس مەدياتورلاردىڭ كومەگىمەن شەشۋگە بولادى.

پورتالدىڭ مالىمەتىنشە، بۇل نورما 2015-جىلدىڭ 2- مامىرىنان باستاپ زاڭدى كۇشىنە ەنەدى.

بۇرىن ق ر جەر كودەكسىنىڭ 167-بابى بويىنشا، جەر داۋى سوت تارتىبىمەن قارالاتىن، ەندى بۇل نورما 2-تارماققا قوسىمشا رەتىندە ەنگىزىلدى. جاڭا پۋنكتتە بىلاي دەلىنگەن: «جەكە مەنشىكتەگى جەر ۋچاسكەلەرىنە بايلانىستى داۋلار (جانجالدار) تاراپتاردىڭ كەلىسۋى بويىنشا مەدياتسيا تارتىبىمەن قارالۋى مۇمكىن».

قازاق مەدياتسيا ورتالىعىنىڭ باسشىسى يرينا ۆيگوۆسكايانىڭ ايتۋىنشا، مەدياتورلىق كومەك تەك جەكە تۇلعالار ءۇشىن قولدانىلادى. ەگەر جانجالداسۋشى تاراپتىڭ بىرەۋى زاڭدى تۇلعا بولسا مەدياتورلار كومەك كورسەتە المايدى.

ايتا كەتەيىك، مۇنداي دەلدالداردىڭ قىزمەتى اقىلى، ونىڭ قۇنى جانجالدىڭ قيىندىعىنا بايلانىستى بەلگىلەنەدى. ەگەر كليەنت حالىقتىڭ الەۋمەتتىك قورعالماعان توبىنان بولسا قىزمەت ءۇشىن اقى الىنبايدى.