ق ر پرەزيدەنتى: كەيىنگە ۇرپاققا كەمەل قازاقستاندى تابىستاۋ - بارشامىزعا ورتاق پارىز
«ۇلانعايىر جەرى بار، ۇلى مۇراتى بار، بابالارى جازعان ۇلى تاريحى مەن ۇرپاعى كوز تىككەن ۇلى بولاشاعى بار حالىقتىڭ مىڭجىلدىق تاريحىندا ەڭ بىرەگەي، ءبىرتۇتاس كەزەڭىندە ەلىمنىڭ سەنىمىن ارقالاعانىم مەن ءۇشىن ەڭ بيىك مارتەبە، باقىت. كەيىنگە ۇرپاققا كەمەل قازاقستاندى تابىستاۋ - بارشامىزعا ورتاق پارىز»، - دەدى ن. نازاربايەۆ.
بۇدان بولەك، ەلباسى جاڭا عاسىردىڭ سىن-قاتەرلەرىنە توتەپ بەرىپ، دامىعان ەلدەردىڭ قاتارىنا قوسىلۋدىڭ دا ورتاق جاۋاپكەرشىلىك ەكەنىن اتاپ ءوتتى.
«ءبىز ۇرپاققا كوركەيگەن ەلدى، نىعايعان بىرلىكتى، مىزعىماس تۇراقتىلىق پەن ەسەلەنگەن بايلىقتى ميراس ەتەمىز. بۇگىن قازاقستان تاريحىنىڭ جاڭا بەتى اشىلدى. ءبىز دامۋدىڭ داڭعىلىنا تىڭ قاداممەن اياق باسامىز. بەس حالىقتىق رەفورمانى تابىستى جۇزەگە اسىرىپ، بولاشاعى ءبىرتۇتاس ەلگە اينالامىز»، - دەدى مەملەكەت باسشىسى.
سونىمەن قاتار ق ر پرەزيدەنتى قازاقستاندى الەمدىك كوشباسشىلاردىڭ قاتارىنا كىرگىزۋ مىندەتى تۇرعانىن دا باسا ايتتى.
ق ر پرەزيدەنتى نۇرسۇلتان نازاربايەۆ قازاقستاندى بولاشاق الەمىندە كوشباسشىلار دەڭگەيىنە دەيىن جەتكىزۋگە نيەتتى.
«ءبىزدىڭ الدىمىزدا تۇبەگەيلى ۇلكەن مىندەت تۇر، ياعني ءبىزدىڭ مەملەكەتتىك كەمەنى سۋعا باتپايتىنداي ەتۋ. سوندىقتان دا الداعى جىلداردىڭ ماقساتى - قازاقستاندى نىعايتىپ، الەمدەگى تولقۋلارعا قاراماستان، الدىڭعى قاتارلى 30 مەملەكەتتىڭ قاتارىنا سەنىمدى كىرۋ»، - دەپ توقتالعان پرەزيدەنت، وسى ورايدا سايلاۋالدى تۇعىرناماسى بولعان بەس ينستيتۋتسيونالدى رەفورمالاردى ۇسىنعانىن اتاپ ءوتتى.
مەملەكەت باسشىسى 26 -ساۋىردەگى سايلاۋدىڭ ناتيجەسىن رەفورمالاردى دەرەۋ وتكىزۋ بويىنشا حالىقتىڭ مانداتى رەتىندە قابىلداپ وتىرعانىن جەتكىزدى. «مەن ءوزىمنىڭ ەركىمدى، تاباندىلىعىمدى، سونداي-اق مەملەكەتتىك اپپاراتتى جانە بارشا قوعام مەن قازاقستاندىقتاردىڭ كۇش- جىگەرىن وسى رەفورمالاردى ورىنداۋعا شوعىرلاندىرۋعا نيەتتىمىن»، - دەدى ن. نازاربايەۆ.
