التاي بالىنىڭ ەكسپورت كولەمى ارتتى

استانا. قازاقپارات - شىعىس قازاقستان وبلىسىنىڭ ومارتاشىلارى بال ەكسپورتىنىڭ كولەمىن ارتتىردى.

قازىر وڭىردەگى ءبىرقاتار شارۋاشىلىق ءوز ونىمدەرىن قىتايعا ساتىپ جاتىر.

بىلتىر بۇل ەلگە شەكارالاس مەملەكەتتەر جارمەڭكەسى كەزىندە 50 تونناعا جۋىق بال ەكسپورتتالعان.

سايكەسىنشە وڭىردەگى ومارتاشىلارعا مەملەكەتتەن جىل سايىن بەرىلەتىن سۋبسيديانىڭ كولەمى دە ارتىپ كەلەدى. «پاسەكا» كومپانياسى وڭىردەگى بال ونىمدەرىن وندىرەتىن 15 شارۋاشىلىقتىڭ باسىن بىرىكتىرىپ وتىر.

تاۋ مەن دالادا جانە ءارتۇرلى دارۋمەندىك گۇلدەردىڭ ءتۇر- تۇرىنەن جاسالعان بالدى ەڭ سوڭعى ۇلگىدەگى زاماناۋي قۇرىلعىلارمەن وڭدەيدى. شارۋاشىلىق 2014 -جىلى «جۇمىسپەن قامتۋدىڭ جول كارتاسى-2020» باعدارلاماسى بويىنشا 90 ميلليون تەڭگە نەسيە العان.

ناتيجەسىندە بالدى قۇتىعا قۇيۋ قوندىرعىلارىن جاڭالادى. قازىر «التاي بالى» دەگەن برەندتىك بەلگىمەن وندىرىلگەن ءونىم قازاقستاننىڭ بارلىق تۇكپىرىنە جونەلتىلەدى. تاپسىرىس تا جىل ساناپ ارتىپ كەلەدى. 2014 -جىلى تەك تاپسىرىس بويىنشا 200 توننا بال جونەلتكەن. ەندى جىلدىق ءونىمنىڭ كولەمىن 5 مىڭ تونناعا جەتكىزبەك. ومارتاشىلار بالدىڭ باسىم بولىگىن قىتاي ەلىنە ەكسپورتتاۋدا.

ال وبلىستاعى باستاۋىش سىنىپتاردىڭ وقۋشىلارىنا ساباق ۋاقىتىندا بال بەرىلىپ كەلە جاتقانىنا 6 -جىلدان استى. دارىگەرلەردىڭ ايتۋىنشا، ءوڭىردىڭ وزىندە وندىرىلەتىن تابيعي ءونىم بالا دەنساۋلىعىنىڭ مىقتى بولۋىنا كەپىل. وبلىستاعى ومارتاشىلار ەكسپورت كولەمىن ودان ءارى ارتتىرىپ، شەتەلدەردە وتەتىن ءتۇرلى جارمەڭكەلەردە ونىمدەرىن ناسيحاتتاۋ ءۇشىن حالىقارالىق سەرتيفيكات قاجەت.

قازىر وبلىستىق اۋىلشارۋاشىلىعى باسقارماسىنداعى ماماندار وسى ماسەلەمەن اينالىسىپ جاتىر. التاي بالىنا قازىر چەحيا، ۆەنگريا جانە گەرمانيانىڭ ىقىلاسى اۋىپ وتىر. سوندىقتان وبلىستاعى ومارتاشىلار حالىقارالىق ستاندارتتاۋ سەرتيفيكاتىنا نەعۇرلىم تەزىرەك قول جەتكىزسە، الەم نارىعىنداعى بال وندىرۋشىلەرمەن باسەكەگە سوعۇرلىم تەز تۇسپەك.

www.24.kz