08:37, 29 - ءساۋىر 2015 | GMT +5
الماتىداعى ورتتەن شىعىنعا ۇشىراعان ساۋداگەرلەرگە تەگىن ورىندار بەرىلەدى
استانا. قازاقپارات - ءورتتىڭ سالدارىنان شىعىنعا ۇشىراعان ساۋداگەرلەرگە تەگىن ورىندار بەرىلەدى، - دەپ حابارلايدى «جەتىنشى ارنا».
بۇل تۋرالى تەلەارنا تىلشىلەرىنە «ادەم» ساۋدا ورتالىعىنىڭ ديرەكتورى ەربول تىنبايەۆ مالىمدەدى.
ونىڭ ايتۋىنشا، ساۋدا ورىندارىندا شىعىنعا ۇشىراعان كاسىپكەرلەرگە تەگىن ورىندار بەرىلەدى. «ورتەنگەن «ادەم» ساۋدا ءۇيىن ءبىز مەيلىنشە قىسقا مەرزىمدە قايتا سالىپ بىتىرەمىز.
ودان كەيىن سول جەردە جۇمىس ىستەگەن كاسىپكەرلەرگە ءوز ورىندارى تەگىن بەرىلەدى. مۇنى مەن رەسمي تۇردە مالىمدەيمىن. ءتىپتى كەپىل حات بەرۋگە دە ءازىرمىن»، - دەدى تىنبايەۆ.
ەسكە سالا كەتەيىك، الماتى قالاسىنداعى «ادەم» ساۋدا ورتالىعىنىڭ 25 مىڭ شارشى مەترىن ءورت شالعان بولاتىن. ءتىلسىز جاۋ 26 -ساۋىردە كەشكى ۋاقىتتا باستالدى.
كەيىن ساۋدا ورتالىعىندا ءورت قاۋىپسىزدىك ەرەجەسىن بۇزۋ دەرەگى انىقتالىپ، اۆتوماتتاندىرىلعان ءورت ءسوندىرۋ جۇيەسىنىڭ ىستەن شىققانى راستالدى.
