باتىرحان شۇكەنوۆكە ونەر ۋنيۆەرسيتەتىنىڭ ستۋدەنتتەرىنە ساباق بەرۋدى ۇسىنعان بولاتىنمىن - ا. مۇساقوجايەۆا
بۇگىن جۋرناليستەرگە بەرگەن سۇحباتىندا ا. مۇساقوجايەۆا بەلگىلى ءانشىنىڭ قازاسىنا قاتتى قايعىرعانىن جەتكىزدى.
«مەن ءۇشىن بۇل وتە قايعىلى حابار بولدى. باتىرحان ءالى تىم جاس ەدى. ونىڭ بارلىق جەتىستىكتەرى ءالى الدا بولاتىن. ءتىپتى ول ءوز شەبەرلىگىن جاس انشىلەرگە ۇيرەتۋدى جوسپارلاعان. مەن ونى ۇنەمى ءبىزدىڭ ۋنيۆەرسيتەتكە شاقىرىپ: «قازاق ەستراداسىنىڭ قالاي دامۋى كەرەك ەكەنىن سەن بىلەسىڭ. سەن وعان قالاي قول جەتكىزۋدى دە بىلەسىڭ. سوندىقتان سەن جاستارعا جول كورسەتۋىڭ كەرەك. سەن بىزگە قاجەتسىڭ. بىزگە وسى جولدى ءجۇرىپ وتكەن ۇستازدار مەن تالىمگەرلەر كەرەك» دەيتىنمىن، - دەدى ا. مۇساقوجايەۆا.
ونىڭ ايتۋىنشا، باتىرحان بۇل ۇسىنىستى قوش كوردى، الايدا ءازىر قولى تيمەيتىنىن، كونسەرتى كوپ ەكەنىن، ءبىراق بولاشاقتا پەداگوگتىق جولعا تۇسەتىنىن ايتقان ەكەن.
قازۇوۋ رەكتورىنىڭ سوزىنشە، ب. شۇكەنوۆ ءار ۋاقىتتا قازاقستاندى تەك رەسەي تىڭدارماندارىنا عانا ەمەس، كوپتەگەن شەتەلدىكتەرگە دە جاقسى جاعىنان تانىتىپ ءجۇردى.
«رەسەيلىك ارىپتەستەرى ول تۋرالى تەك جاقسى سوزدەر ايتاتىن. مەنىڭ سىنىپتاسىم بايعالي سەركەبايەۆ جانە باسقا دا دوستارىم باتىرحاننىڭ رەسەي مەن باسقا دا شەت ەلدەردە قازاقستاننىڭ اتىن اسقاقتاتىپ جۇرگەنىن ماقتانىشپەن ايتاتىن. ءبىراق مەن باتىرحاندى بارىنەن بۇرىن قازاقستانمەن بايلانىستىرعىم كەلەتىن. مەنىڭ ويىمشا، ونىڭ جۇرەگى ءومىر بويى تەك قازاقستان دەپ سوقتى»، - دەدى ا. مۇساقوجايەۆا.
ەستەرىڭىزگە سالا كەتەيىك، بەلگىلى ءانشى ب. شۇكەنوۆ ماسكەۋدەگى پاتەرىندە جۇرەك تالماسىنان كوز جۇمدى. ول الماتىدا جەرلەنەتىن بولادى.
اۆتور: ءابۋ- اسقار مەكەش ۇلى
