كەزەكتەن تىس پرەزيدەنت سايلاۋى ەلىمىزدىڭ بەدەلىن تاعى ءبىر ساتىعا كوتەردى
بۇل تۋرالى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسورى، پەداگوگيكا عىلىمدارىنىڭ دوكتورى سايرا جيەنبايەۆا مالىمدەدى.
«ءدال قازىر، الەمدى جايلاعان داعدارىس كەزىندە بىرلىگىمىزدى نىعايتۋ - بىزگە بارىنەن دە قۇندى! ەلباسىمىز ن. نازاربايەۆتىڭ 97 پايىزدان اسا داۋىس جيناۋىنىڭ ءوزى - وسى كەزەڭگە دەيىنگى ەلىمىزدىڭ گۇلدەنۋى، وركەندەۋى، حالىقتىڭ ءال-اۋقاتىنىڭ جاقسارۋى جولىندا جاساعان ەرەن ەڭبەگىنىڭ جەمىسى. بۇل سايلاۋ ەلىمىزدى ۇلى ىستەرگە ۇيىستىرا تۇسەدى دەپ ويلايمىن. سوندىقتان ءبىز - قازاقستاندىقتار، ەلباسىمەن بىرگە الداعى بيىك بەلەستەر مەن اسقاق اسۋلارعا شىعۋ ءۇشىن بارلىق كەدەرگىلەردى باعىندىرىپ، العا ۇمتىلۋىمىز كەرەك»، - دەدى س. جيەنبايەۆا.
ول سونىمەن قاتار، سايلاۋعا جاستاردىڭ بەلسەنە قاتىسۋى بولاشاققا دەگەن سەنىمدىلىكتى ارتتىرا تۇسەتىندىگىن جەتكىزدى.
«داۋىس بەرۋگە كەلگەندەردىڭ كوپشىلىگىنىڭ جاستار ەكەنىن ەسكەرسەك، ولاردىڭ كەزەكتە تۇرىپ، شارشاماي داۋىس بەرۋى، وسى ەلدىڭ ازاماتى رەتىندە مەملەكەت ىسىنە ءوزىنىڭ قاتىسى بارلىعىن سەزىنگەندىگىن بىلدىرەدى. مۇنىڭ ءوزى بۇكىل الىپ مەملەكەتتەردىڭ الدىندا ەلىمىزدىڭ تۇتاستىعىن، «ءبىر جەڭنەن قول، ءبىر جاعادان باس شىعاراتىن» بىرلىگىمىزدىڭ بار ەكەندىگىن كورسەتەدى»، - دەدى س. جيەنبايەۆا.
اۆتور: جاپپاربەرگەن ايبوتا
