الماتىدا قۇلاعان كوپىر تۋرالى ەلىمىزدىڭ باس مەملەكەتتىك ەڭبەك ينسپەكتورى تۇسىنىكتەمە بەردى

استانا. قازاقپارات - ق ر دەنساۋلىق ساقتاۋ جانە الەۋمەتتىك قورعاۋ مينيسترلىگىنىڭ ەڭبەك، الەۋمەتتىك قورعاۋ جانە كوشى-قون كوميتەتىنىڭ ءتوراعاسى، باس مەملەكەتتىك ەڭبەك ينسپەكتورى احمادي سارباسوۆ جۋرناليستەرگە الماتىدا قۇلاعان كوپىر تۋرالى تۇسىنىكتەمە بەردى.

ونىڭ ايتۋىنشا، وقيعا سالدارىنان 21 ادام زارداپ شەكتى، ولاردىڭ ۇشەۋىنىڭ ءحالى اۋىر، ال ءبىر ادام قازا بولدى.

«قازىرگى ۋاقىتتا الماتى قالالىق مەملەكەتتىك ەڭبەك ينسپەكسياسى وقىس وقيعا بويىنشا ارنايى زەرتتەۋ جۇرگىزىپ جاتىر. وعان بارلىق مۇددەلى مەملەكەتتىك ورگاندار، جۇمىس بەرۋشى مەن جۇمىسشىلاردىڭ وكىلدەرى تارتىلعان. وسى كوميسسيا جۇمىسىنىڭ ناتيجەسىندە بولعان وقيعانىڭ سەبەپتەرى انىقتالاتىن بولادى، ازىرگە ەشقانداي ناقتى ناتيجە جوق. جاقىن ارادا سەبەپتەرى بەلگىلى بولادى»، - دەدى ول بۇگىن استانادا وتكەن حالىقارالىق ەڭبەكتى قورعاۋ كونفەرەنسياسى كەزىندە جۋرناليستەرگە بەرگەن سۇحباتىندا.

ونىڭ ايتۋىنشا، ەگەر جىبەرىلگەن قاتەلىكتەر اكىمشىلىك قۇقىق بۇزۋشىلىقتار تۋرالى كودەكسكە كەلەتىن بولسا، جۇمىس بەرۋشى ايىپپۇل تولەۋگە مىندەتتەلەدى. ەگەر دە تەرگەۋ جۇمىستارى بارىسىندا قىلمىستىق ءىس-ارەكەتتەر اشكەرەلەنەتىن بولسا، وندا قۇرىلىس جۇرگىزۋشى كومپانيا قىلمىستىق جاۋاپكەرشىلىككە تارتىلادى.

ا. سارباسوۆتىڭ ايتۋىنشا، زارداپ شەككەندەر مەن قازا بولعان جۇمىسشىنىڭ جانۇياسى مىندەتتى ساقتاندىرۋ مەن ەڭبەك كەلىسىمشارتىندا بەلگىلەنگەن ءبىرقاتار وتەماقىلاردى الادى.

اۆتور: ءابۋ-اسقار مەكەش ۇلى