قازاق راديوسىنان «بوگەنباي باتىر» جىرىن تىڭداڭىز
جىردا تۇتاس ءبىر ءداۋىردى جان- جاقتى قامتي وتىرىپ، سول كەزدەگى ەل ىشىندەگى الەۋمەتتىك قايشىلىقتار مەن حالىقتىڭ ءومىرى، ارمان- تىلەگى، باتىرلاردىڭ جاۋعا قارسى ەرلىك كۇرەسى باياندالادى.
كونە عاسىرلار قويناۋىنان باستاۋ الىپ، بۇگىنگە دەيىن ۇزىلمەي جەتكەن باتىرلىق ەپوستار حالقىمىزدىڭ تالاي بۋىنىن ەرلىك پەن ەلدىك رۋحىندا تاربيەلەۋدە. قازاقتىڭ قاھارماندىق جىرلارىنىڭ ءبىرى - «بوگەنباي باتىر». بۇل ەپوستا XVII- XVIII عاسىرلارداعى قازاق پەن قالماق اراسىنداعى جاۋگەرشىلىك كەزەڭدە ابىلاي حان ساربازدارىن باسقارعان، دارىندى قولباسشى قانجىعالى بوگەنباي باتىردىڭ ەرلىك جورىقتارى باياندالادى. بۇل جىردىڭ جيناۋشىلارى بۇگىنگە دەيىن بەلگىسىز. ال، جىرشىسى - شەريازدان سۇلتانباي ۇلى.
باتىرلىق ەپوستاردىڭ ءماتىنى ءبىلىم جانە عىلىم مينيسترلىگى ورتالىق عىلىمي كىتاپحاناسىنىڭ سيرەك قورىندا ساقتالعان قولجازبا بويىنشا ءتۇپنۇسقادان ازىرلەنگەن. «باتىرلار جىرى» حابارىنىڭ وتكەن سانىندا بۇل جىردى ەلميرا جاڭابەرگەنوۆا، ماقپال توقتاعانوۆا، سەرىك جاقسىعۇلوۆ ورىنداعان بولاتىن.
