گيننەس رەكوردىن جاڭارتقان قىتايلىق قانداسىمىز

استانا. قازاقپارات - قىتايدىڭ التاي ايماعىندا تۇراتىن ەتنيكالىق قازاق ارشىن نامازبەك ۇلى مۋلتفيلم كەيىپكەرلەرىنىڭ بەينەسىن ەڭ كوپ سىزعان سۋرەتشى رەتىندە گيننەستىڭ رەكوردتار كىتابىنا ەنگەن.

ازاتتىققا بەرگەن سۇحباتىندا 28 جاستاعى جىگىت قازىرگى ماقساتى - قازاقى ناقىشتاعى قۋىرشاق، كادەسىي زاتتارىن جاساۋ ەكەنىن ايتتى.

- مۋلتفيلم كەيىپكەرلەرىنىڭ بەينەسىن سىزۋمەن قاي كەزدەن اينالىساسىز؟ اتا- اناڭىزدىڭ ءبىرى وسى سالادا قىزمەت ىستەي مە؟

ارشىن نامازبەك ۇلى: - جوق، ەكەۋى دە ونەرگە ەش قاتىسى جوق سالادا قىزمەت ەتەدى. انام التاي قالاسىندا سوتتا جۇمىس ىستەيدى. اكەم - جەرگىلىكتى ءدارى دايىندايتىن مەكەمەدە قىزمەتكەر.

نەگىزى، قۋىرشاق جاساۋ، ولاردىڭ سۋرەتىن سالۋعا بالا كەزدەن اۋەس ەدىم. ناقتى قاي جاستان باستاپ سىزا باستاعانىم ەسىمدە جوق. ءبىراق، كورگەن كەيىپكەرلەرىمنىڭ بەينەسىن كينوداعىداي ەمەس، ءوز قابىلداۋىم بويىنشا سىزاتىنمىن. كەيىن قاراسام وزگەشە بولىپ شىققان ەكەن. 2007 -جىلدان باستاپ وسى جۇمىستى شىنداپ قولعا الدىم. ول كەزدە مەنىڭ جاساعان جۇمىسىم وتىز شاقتى عانا ەدى.

- پەكيندە سۋرەت سالۋدى ارنايى وقىپ ۇيرەنگەن ەكەنسىز؟

- اۋەلگى وقىعان ماماندىعىم باسقا بولاتىن - ءۇرىمجى قالاسىندا ءۇي ىشىنە ارلەۋ جۇمىستارىن جۇرگىزۋ بويىنشا ەكى جىل ءبىلىم الدىم. ءبىراق، كەيىن ونى تاستاپ كەتتىم.

2008 -جىلى ۇرىمجىدە مۋلتفيلم كەيىپكەرى سۋرەتىن سالۋدان وتكەن جارىسقا قاتىسىپ، ءۇشىنشى دارەجەلى ديپلومعا يە بولدىم. وسىدان كەيىن ۋ حۋا جياڭ ەسىمدى ۇستازىم ىشكى جاققا بارىپ ءبىلىمىمدى جەتىلدىرۋگە كەڭەس بەردى. ءسويتىپ، مۇنداعى وقۋىمدى تاستاپ بەيجىڭگە باردىم. وندا قۋىرشاقتاردى (مۋلتفيلم كەيىپكەرلەرىن - رەد. ) جاساۋدى ۇيرەتەتىن سەگىز ايلىق كۋرستان ءوتتىم دە، بىردەن قىزمەتكە كىرىستىم. 2013 -جىلعا دەيىن پەكيندەگى مۋلتفيلم جاسايتىن كومپانيالاردا جۇمىس ىستەدىم. بالالارعا ارنالعان قۋىرشاق كينولارداعى كەيىپكەرلەردىڭ ءتۇرلى سىزبالارىن، بەينەلەرىن جاساۋمەن اينالىستىق.

- گيننەستىڭ رەكوردتار كىتابىنا قالاي ەندىڭىز؟

​ - 2014 -جىلى ساناسام سالعان سۋرەتتەرىم ءۇش مىڭنان اسىپتى. سونان كەيىن رەكوردتاردى انىقتايتىن كوميسسياعا ءوتىنىش بەردىم. مەن ۇسىنعان 3157 جۇمىستى قابىلداعان شياڭگانداعى (گونكونگ) دۇنيەجۇزىلىك رەكورد قوعامىنان «الەمدىك رەكورد جاڭارتتىڭ» دەپ حابارلادى. باستاپقىدا سۋرەتتەردى ون مىڭعا دەيىن جەتكىزسەم بە دەگەن دە وي بولعان. ءبىراق، باسقا كاسىپپەن اينالىسا باستاعاننان كەيىن ول ويىمنان قايتتىم.

- قازىرگى كاسىبىڭىز قانداي؟

-  قازىر كينوداعى قۋىرشاق بەينەسىن ەمەس، ناقتى مۇسىندەر جاساۋدى قولعا الدىم. بالا كۇننەن قىتايدىڭ نەمەسە شەتەلدىڭ قۋىرشاقتارى، ويىنشىقتارىمەن ويناپ وستىك. كەيىن ەر جەتىپ ءار جەرگە بارعاندا بازاردا نەمەسە ساۋدا ورىندارىندا سىي- سياپاتقا ارنالعان مۇسىندەردى ءجيى كورەتىن بولدىم. ءبىراق كورگەندەرىم وزگە ەلدىكى ەدى. سوندا مەنى نەگە قازاقى قۋىرشاقتار جوق دەگەن وي مازالايتىن. اقىرى، ءىنىم لاشىن ەكەۋمىز بىرىگىپ جەكە كاسىپ اشتىق. تارتۋ- تارالعى، كادەسىيعا ارنالعان قازاقي مۇسىندەر، قۋىرشاقتار جاساۋمەن اينالىسىپ جاتىرمىز. وسى جەردەن كىشكەنتاي ءبىر زاۋىت اشىپ، دۇنيەلەرىمىزدى بازارعا شىعارماقپىز. وندا تەك قۋىرشاقتار عانا ەمەس، ءتۇرلى- ءتۇستى قازاقى ناقىشتاعى شاشباۋلار، تەلەفون قاپتارى، مونشاقتار جانە ت. ب. زاتتار وندىرىلەدى.

- سوندا قۋىرشاقتار بەينەسىن سىزۋدى ءبىرجولاتا توقتاتتىڭىز با؟

- جۇمىس اراسىندا ۋاقىت تاۋىپ سۋرەتتەر سالىپ تۇرسام دەگەن وي بار.

- قازاق تىلىنە شورقاق ەكەنىڭىزدى ايتىپ كەشىرىم سۇرادىڭىز. سەبەبى قانداي؟

- قازاق تىلىنە شورقاق ەكەنىم راس. مەن 1986 -جىلى 11 - تامىزدا قىتايدىڭ التاي ايماعىنىڭ ورتالىعى التاي قالاسىندا دۇنيەگە كەلىپپىن. التايدا قىتاي مەكتەبىندە وقىدىم. جالپى بۇل جاقتاعىلاردىڭ كوبى بالالارىن قىتاي مەكتەبىنە بەرۋدى ءجون كورەدى. ويتكەنى، قىتاي تىلىندە ءبىلىم العاندارعا بولاشاقتا جاقسى قىزمەتكە تۇرۋ جەڭىل بولادى دەپ سانالادى.

  

- سۇحبات بەرگەنىڭىزگە راقمەت.

«ازاتتىق»