قىزىلوردالىق ارتىستەر لوندوندا قازاقشا سپەكتاكل قويىپ قايتتى
بۇگىن سىر ەلىنىڭ قارا شاڭىراعى تەاتر ۇجىمىن ۇلكەن قوشەمەتپەن قارسى الدى.
لوندون قالاسىندا قازاق تىلىندەگى قويىلىم العاش رەت وتكىزىلدى. وندا كورەرمەن ءتىلدى تۇسىنبەسە دە، قازاق ءتىلىنىڭ اۋەزدىلىگىنە تاڭ قالدى. بۇل تۋرالى بۇگىن وبلىستىق كوممۋنيكاتسيا ورتالىعىندا وتكەن بريفينگتە قازاقستان رەسپۋبليكاسى ەڭبەك سىڭىرگەن قايراتكەرى، قىزىلوردا وبلىستىق دراما تەاترىنىڭ كوركەمدىك جەتەكشىسى قۇسەيىن ءامىر- تەمىر مالىمدەدى.
- لوندون حالقىنا دۋلات يسابەكوۆتىڭ «ەسكى ۇيدەگى ەكى كەزدەسۋ» دراماسىن ۇسىندىق. ءىس- ساپارعا ۇجىمنان ون ادام بارعان بولاتىنبىز. 400 ورىندىق بريتان كورولدىك مۋزىكالىق تەاترىنداعى قويىلىمدى اعىلشىن ازاماتتارى، «بولاشاق» باعدارلاماسىمەن وقىپ جاتقان ستۋدەنتتەر جانە سول ەلدەگى قازاقتار جانە ارنايى كەلگەن قازاقستاننىڭ ۇلى بريتانياداعى ەلشىسى ەرجان قازىحانوۆ تاماشالادى.
قويىلىمنان سوڭ سول ەلدە وقىپ جاتقان ستۋدەنتتەر «ەلگە بارىپ كەلگەندەي كۇي كەشتىك» دەگەن قۋانىشىن جەتكىزدى. اعىلشىن ازاماتتارىنىڭ ءبىزدىڭ تەاترىمىزدى، قويىلىمدى جاقسى قابىلداعانىنا قۋاندىق. ءتىپتى، كۇلەتىن جەرىندە بىزبەن كۇلىپ، جىلايتىن جەرىندە جىلاپ قويىلىمنان كەيىن ۇزاق قوشەمەتپەن شىعارىپ سالدى، - دەدى قويىلىمنىڭ رەجيسسەرى قۇسەيىن ءامىر- تەمىر.
ايتا كەتۋ كەرەك، ترۋپپا گاسترولدەرى 26 - ساۋىرگە تۇسكەندىكتەن، ارتىستەر ق ر ەلشىلىگىندە دايىندالعان سايلاۋ ۋچاسكەسىندە داۋىس بەردى.
«وندا ەرجان قازىحانوۆتىڭ قابىلداۋىندا بولىپ، ايماق باسشىسى قىرىمبەك كوشەربايەۆتىڭ اماناتى قورقىت اتا بەينەلەنگەن سۋرەتتى تابىس ەتتىك. سونان سوڭ ارنايى دايىندالعان قازى- قارتا، قۇرت- ىرىمشەككە تولى قازاق داستارحانىنان ءدام تاتقىزدى»، - دەدى ترۋپپا رەجيسسەرى.
الداعى مامىر ايىنىڭ ون ەكىسىنەن باستاپ، وبلىستىق بەكەجانوۆ اتىنداعى مۋزىكالىق- دراما تەاترىنىڭ ترۋپپاسى قالادا عانا ەمەس، اۋداندارعا دا قويىلىمدار قويۋدى جوسپارلاپ وتىر.
اۆتور: ەلۋباي اۋەزوۆ
