سەمەيدە «اباي - الەم تىلدەرىندە» كورمەسى اشىلدى
كورمەدە اباي مۇراسىن جان-جاقتى تانىتۋعا باسا نازار اۋدارىلدى. مۇراجاي قورىندا جيناقتالعان 32 تىلگە اۋدارىلعان اباي شىعارمالارىنىڭ بىرەگەي جيناقتارى، قولجازبالارى، تاقىرىپقا بايلانىستى تاريحي فوتو سۋرەتتەر، شەتەل ەلشىلەرىنىڭ العىس-تىلەكتەرى، پىكىرلەرى، اۋدارماشىلار تۋرالى مالىمەتتەر، اۋدارماشىلاردىڭ حاتتارى العاش رەت كورمەگە شىعارىلدى.
كورمەنىڭ اشىلۋ سالتاناتىندا مۇراجاي ديرەكتورىنىڭ عىلىمي ىستەر جونىندەگى ورىنباسارى م. قايرامبايەۆا ءسوز سويلەپ، «دوستىق ءۇيىنىڭ» ديرەكتورى ا. تىلەۋبايەۆ جانە ارداگەر ح. ماتايەۆ شارانىڭ تۇساۋىن كەستى.
سەمەيدىڭ اباي اتىنداعى قازاق دراما تەاترىنىڭ اكتەرى ا. اشىمبايەۆ اقىن وبرازىندا ولەڭمەن شاشۋ شاشتى. اباي مۇراجايىنىڭ عىلىمي قىزمەتكەرلەرى م. مۇحامەدوۆا، س. مۇقاتايەۆا، ر. ەلەكەنوۆا قازاق، ورىس، اعىلشىن تىلدەرىندە كورمە بويىنشا ەكسكۋرسيا جۇرگىزدى.
مادەني شاراعا قالاداعى ءتۇرلى ۇلت وكىلدەرى، ارداگەرلەر، جوعارى وقۋ ورىندارىندا شەت ەلدەن كەلىپ ءبىلىم الىپ جاتقان ستۋدەنتتەر، مەكتەپ وقۋشىلارى، كوللەدج ستۋدەنتتەرى، زيالى قاۋىم قاتىستى.
