وزبەكستان، تاجىكستان رەسپۋبليكالارىنىڭ پرەزيدەنتتەرى ن. نازاربايەۆتى پرەزيدەنتتىك سايلاۋدا جەڭىسكە جەتۋىمەن قۇتتىقتادى
بۇل تۋرالى اقوردانىڭ باسپا ءسوز قىزمەتى حابارلادى.
يسلام كارىموۆ نۇرسۇلتان نازاربايەۆتى پرەزيدەنتتىك سايلاۋداعى جەڭىسىمەن قۇتتىقتادى.
- وتكەن سايلاۋداعى ءسىزدىڭ ايقىن جەڭىسىڭىز حالىقتىڭ جوعارى سەنىمىنىڭ جانە ءوزىڭىزدىڭ كورەگەن باسشىلىعىڭىزبەن جۇرگىزىلگەن، قازاقستان حالقىنىڭ باقۋاتتىلىعىنا، سونداي- اق ەلدىڭ حالىقارالىق ارەناداعى ءرولى مەن بەدەلىن ارتتىرۋعا باعىتتالعان قوعامدىق- ساياسي، الەۋمەتتىك- ەكونوميكالىق تەرەڭ رەفورمالاردى قولداۋىنىڭ ايشىقتى ايعاعى بولدى، - دەلىنگەن جەدەلحاتتا.
وزبەكستان پرەزيدەنتى سان عاسىرلىق ءداستۇرلى دوستىققا، تاتۋ كورشىلەستىككە جانە ءوزارا قۇرمەتكە نەگىزدەلگەن جان- جاقتى دامۋ مەن ەكىجاقتى قارىم- قاتىناستىڭ نىعايۋى بۇدان ءارى دە ەكى ەل حالقىنىڭ مۇددەسىنە، وڭىردەگى بەيبىتشىلىك پەن تۇراقتىلىقتىڭ ساقتالۋىنا قىزمەت ەتە بەرەتىنىنە سەنىم بىلدىرگەن.
- وسى مۇمكىندىكتى پايدالانا وتىرىپ، سىزگە مىقتى دەنساۋلىق، سارقىلماس كۇش- جىگەر جانە مەملەكەتتىك قىزمەتىڭىزگە جاڭا تابىس، ال باۋىرلاس قازاقستان حالقىنا يگىلىك پەن باق- بەرەكە تىلەيمىن، - دەلىنگەن قۇتتىقتاۋدا.
يسلام كارىموۆ سونداي- اق نۇرسۇلتان نازاربايەۆتى قازاقستان رەسپۋبليكاسى پرەزيدەنتىنىڭ سايلاۋىنداعى جەڭىسىمەن كەيىنىرەك تەلەفون ارقىلى سويلەسۋ كەزىندە دە قۇتتىقتادى.
بۇدان بولەك، مەملەكەتتەر باسشىلارى ەكىجاقتى ىنتىماقتاستىقتىڭ وزەكتى ماسەلەلەرىن جانە وزبەكستان پرەزيدەنتىنىڭ ەلىمىزگە 2014 -جىلعى قاراشادا كەلگەن رەسمي ساپارى كەزىندە قول جەتكىزىلگەن ۋاعدالاستىقتاردىڭ ورىندالۋ بارىسىن تالقىلادى.
تەلەفون ارقىلى سويلەسۋگە وزبەك تاراپى باستاماشى بولدى.
ەمومالي راحمون نۇرسۇلتان نازاربايەۆتى پرەزيدەنتتىك سايلاۋداعى جەڭىسىمەن شىن جۇرەكتەن قۇتتىقتايتىنىن جەتكىزگەن.
- ءوزىنىڭ ەرىك- قالاۋى ارقىلى قازاقستان حالقى ەلدى وركەندەتۋگە، ونىڭ حالىقارالىق ارەناداعى بەدەلىن ۇزدىكسىز ارتتىرۋعا جانە حالقىنىڭ باقۋاتتىلىعىنا باعىتتالعان ءسىزدىڭ جاسامپاز ساياساتىڭىزدى كەڭىنەن جانە ءشۇباسىز تۇردە قولدايتىنىن بۇكىل الەمگە پاش ەتتى. بۇل جولدا جەتكەن جەتىستىكتەر ءسىزدىڭ ەسىمىڭىزبەن تىكەلەي بايلانىستى، - دەلىنگەن جەدەلحاتتا.
تاجىكستان پرەزيدەنتى سونداي- اق ءوزارا ءتيىمدى ەكىجاقتى قارىم- قاتىناستىڭ دامۋىن اتاپ وتكەن.
- ءسىز الدا دا ەلدەرىمىز بەن حالىقتارىمىز اراسىنداعى ءوزارا ىقپالداستىقتىڭ اياسى كەڭەيە، تەرەڭدەي تۇسۋىنە سەپتىگىڭىزدى تيگىزە بەرەتىنىڭىزگە سەنىمدىمىن. ءوز تاراپىمىزدان ءبىز ەكى مەملەكەت اراسىنداعى دوستىق قارىم- قاتىناستىڭ نىعايۋى ءۇشىن قاجەتتى نارسەنىڭ بارلىعىن جاسايتىن بولامىز، - دەلىنگەن جەدەلحاتتا.
سوڭىندا ەمومالي راحمون مەملەكەت باسشىسىنا مىقتى دەنساۋلىق، ۇزاق ءومىر، قازاقستاننىڭ دامۋى جولىندا تىڭ تابىستار مەن جاڭا جەتىستىكتەر تىلەدى.
