ن. نازاربايەۆ قاشاعان توڭىرەگىندەگى احۋالعا تۇسىنىكتەمە بەردى
مەملەكەت باسشىسى ءوز سوزىندە اتالعان كەن ورنىنان قازاقستان العاشقى مۇنايدى 2014 - جىلى الۋدى جوسپارلاعاندىعىن ەسكە سالىپ ءوتتى.
«قۇبىرلاردىڭ بارلىعى دۇرىس توسەلىپ، كۇكىرت پەن گازدىڭ ءبولىنۋىن وڭدەۋ زاۋىتى ىسكە قوسىلۋ ءتيىس ەدى. سول ساتتە سۋ استىنداعى جانە سۋ بەتىندەگى قۇبىردان جارىقشاق انىقتالدى. ەگەر جۇمىس جالعاسا بەرگەندە ءىرى اپات ورىن الار ەدى. سوندىقتان دا ءوندىرىستى توقتاتىپ، اتالعان جوعارى قىسىم قۇبىرلارىن اۋىستىرۋ تۋرالى شەشىم قابىلدادىق. ەرەكشە تاڭعالدىرارلىعى - ولار جاپونيادا جاسالعان»، - دەدى ەلباسى.
ق ر پرەزيدەنتى قاشاعان كەن ورنىنا مۇناي ءوندىرۋدى قايتا قولعا الۋ 2015 - جىلدىڭ سوڭىندا نە 2016 - جىلى جاندانۋى مۇمكىن ەكەندىگىن اتاپ ءوتتى.
«قازىرگى ۋاقىتتا كومپانيا قازمۇنايگازبەن بىرلەسىپ، قارقىندى جۇمىس جۇرگىزۋدە. قايتا قالپىنا كەلتىرۋ جۇمىستارىنا شامامەن 2 ميلليارد دوللاردان استام قارجى شىعىندالادى. وسى جىلدىڭ سوڭىندا، نە 2016 - جىلى مۇناي وندىرە باستايمىز دەگەن ءۇمىتىمىز بار»، - دەدى ق ر پرەزيدەنتى.
قازاقستاندىق بيزنەس ەۋرازيالىق ەكونوميكالىق وداق اياسىنداعى كۇرەستە شىڭدالۋى كەرەك. باسپا ءسوز ءماسليحاتى بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.
«8 - مامىردا ماسكەۋدە ەۋرازيالىق ەكونوميكالىق كەڭەستىڭ جوعارى كەڭەسىنىڭ وتىرىسىندا ءبىزدىڭ ۇكىمەتتەرىمىز اتقارىلعان شارالار تۋرالى باياندايتىن بولادى. جالپى، بۇگىنگى تاڭدا ەۋرازيالىق ەكونوميكالىق وداق اياسىندا جاعداي تۇراقتالىپ كەلەدى»، - دەدى ەلباسى.
سونىمەن بىرگە، پرەزيدەنت وتاندىق بيزنەستى ءالى دە باسەكەلەستىكتى شىڭداۋ كەرەكتىگىن العا تارتتى.
«مەن قازاقستاندىقتارعا ەسكەرتكەنمىن. ەگەر ءبىز ءۇش مەملەكەتتىڭ اراسىندا ءجۇرىپ، ءتيىستى دەڭگەيدە باسەكە قۇرا الماساق، وندا بۇكىل الەممەن قالاي باسەكەلەسە الامىز؟ ەگەر ءبىزدىڭ بيزنەسمەندەر جاقسى باعاعا جوعارى ساپالى تاۋار شىعارا الماسا، ول ەۋروپالىق وداقپەن قالاي باسەكەگە تۇسەدى؟ سوندىقتان دا، بيزنەس كۇرەستە شىڭدالۋى كەرەك»، - دەدى نۇرسۇلتان نازاربايەۆ.
اۆتور: مارلان جيەمباي
