سايلاۋ ناتيجەسى - مەنىڭ ەل باسشىلىعىندا ءجۇرىپ وتكەن جولدارىما بەرىلگەن زور باعا - ەلباسى
جۋرناليستەر ساۋالىنا جاۋاپ بەرە وتىرىپ، ەلباسى كەشەگى سايلاۋعا باسقالارعا قاراعاندا كوبىرەك الاڭداعان ادامنىڭ ءبىرى ەكەنىن، تەلەۆيدەنيەدەن، بارلىق وڭىرلەردەن ءتۇسىپ جاتقان اقپاراتتاردى مەزگىل سايىن باقىلاپ تۇرعانىن ايتتى.
«بىلەسىزدەر مە، ەڭ ءبىرىنشى رەت سايلانعاندا تولقۋ ءبىر باسقا، ال 20 جىل وسى لاۋازىمدا قىزمەت ەتىپ كەلىپ، سايلاۋعا قاتىسۋ بۇل مۇلدەم باسقا. شىندىعىندا، حالىقتا دا سەنىڭ وزىڭدە دە شارشاعاندىق بولۋى مۇمكىن. سينگاپۋردىڭ ءبىرىنشى پرەمەر ءمينيسترى، مارقۇم لي كۋان يۋ- دان « ءبارى جاقسى كەلە جاتىر ەدى عوي، نەگە كەتتىڭىز؟» دەپ سۇراعانىمدا ول، ءوزىن تەلەارنالاردان كورگىسى كەلمەگەنىن ايتقان. ارينە، بۇنداي ساتتەر بىزدە دە بولىپ تۇرادى. وسى لاۋازىمدا ۇزاق جىلدار وتىرعانىما قاراماستان، كەشە ەلدەر كەزەككە تۇرىپ، داۋىس بەرۋگە قاتىستى. مينيسترلەردىڭ ءوزى ءبىر ساعات كەزەكتە تۇردى. ادامداردىڭ بالا- شاعاسىمەن، قارت كىسىلەردىڭ نەمەرەلەرىن ەرتىپ، سايلاۋعا بەلسەندى قاتىسۋى، مىنە مەنى تولقىتقان ءسات وسى. بۇل جۇرەكتى تەبىرەنتپەي قويمايتىن ەڭ نازىك دۇنيە»، - دەدى نۇرسۇلتان نازاربايەۆ.
سونىمەن قاتار، پرەزيدەنت قازاقستان مەملەكەتىنىڭ باسشىلىعىندا ءجۇرىپ وتكەن جولدارعا نازار اۋدارا وتىرىپ، كەشەگى سايلاۋ وسىعان بەرىلگەن باعا بولعانىن ايتتى.
اۆتور: قانات مامەتقازى ۇلى
